കൊല്ക്കത്ത: ബിജെപിയുടെ ബംഗാള് അധ്യക്ഷന് ദിലീപ് ഘോഷിന്റെ വാഹനവ്യൂഹത്തിന് നേരെ തൃണമൂല് പ്രവര്ത്തകരുടെ ആക്രമണം. നോര്ത്ത് 24 പര്ഗാന ജില്ലയിലായിരുന്നു ആക്രമണം.
മിനാഖയില് നടന്ന റാലിയെ തൃണമൂല് പ്രവര്ത്തകര് ആക്രമിച്ചു. ബിജെപി അധ്യക്ഷന്റെ നേതൃത്വത്തില് നടന്ന പരിവര്ത്തന് യാത്രയിലെ വാഹനവ്യൂഹത്തിലെ ഏറ്റവും പിന്നിലുള്ള രണ്ട് വാഹനങ്ങളെയാണ് തൃണമൂല് പ്രവര്ത്തകര് ആക്രമിച്ചതെന്ന് പൊലീസ് പറഞ്ഞു. മിനാഖ പൊലീസ് സ്റ്റേഷില്പെട്ട മലഞ്ചയില് എത്തിയപ്പോള് വാഹനത്തിന് നേരെ കല്ലേറുണ്ടായി. ഇതില് നാല് ബിജെപി പ്രവര്ത്തകര്ക്ക് പരിക്കേറ്റെന്നും ബിജെപി പറയുന്നു. രണ്ട് ടേബ്ലോകള്ക്ക് നേരെ ബോംബെറിഞ്ഞതായും ആരോപണമുണ്ട്.
ഏപ്രില്-മെയ് മാസത്തില് നടക്കാന് പോകുന്ന നിയമസഭാ തെരഞ്ഞെടുപ്പിന്റെ ഭാഗമായാണ് ബിജെപി പരിവര്ത്തന് യാത്ര നടത്തുന്നത്. അതേ സമയം ബോംബേറിഞ്ഞുവെന്ന വാര്ത്ത പൊലീസ് നിഷേധിച്ചു.
