ന്യൂദല്ഹി: ജാര്ഖണ്ഡിലെ സരെയ്കെല എന്ന സ്ഥലത്ത് ശനിയാഴ്ച കോണ്ഗ്രസ് സംഘടിപ്പിച്ച കിസാന് ജന് ആക്രോശ് റാലിയില് പാര്ട്ടി നേതാക്കള് വേദിയിലിരിക്കെ ബോളിവുഡ് ഗാനത്തിന് ചുവടുവച്ച് നര്ത്തകി. ദൃശ്യങ്ങള് സമൂഹമാധ്യമങ്ങളില് വ്യാപകമായി പ്രചരിച്ചതോടെ, അടുത്ത റാലിയില് മുന് പോണ് താരം മിയ ഖലീഫ എത്തുമോയെന്ന് കോണ്ഗ്രസിനോട് ആരാഞ്ഞ് ബിജെപി രംഗത്തെത്തി.
കോണ്ഗ്രസിനെ പരിഹസിച്ച് ബിജെപി നേതാവ് സുരേഷ് നഖുവയുടെ ട്വീറ്റ്: ‘കര്ഷക ബില്ലുകള്ക്കെതിരായ പ്രതിഷേധത്തില് സോണിയാ ഗാന്ധിയുടെയും രാഹുല് ഗാന്ധിയുടെയും കോണ്ഗ്രസിന്റെ ജന് ആക്രോശ് റാലിയില്നിന്നുള്ള എക്സ്ക്ലൂസീവ് വിഡിയോ’. പൊതുജന പിന്തുണ ലഭിച്ചില്ലെങ്കില് ആളെ കൂട്ടാന് കോണ്ഗ്രസ് ഇത്തരം കാര്യങ്ങള് ചെയ്യുകയാണെന്ന് ബിജെപി ജാര്ഖണ്ഡ് ഘടകം പ്രതികരിച്ചു.
