മഥുര :സ്വതന്ത്ര ഇന്ത്യയിൽ ആദ്യമായി ഒരു വനിതാ കുറ്റവാളിയെ തൂക്കിലേറ്റാനുള്ള ഒരുക്കങ്ങൾ ഉത്തർപ്രദേശിലെ മഥുര ജയിലിൽ പൂർത്തിയാവുന്നു. ഉത്തര്പ്രദേശിലെ ശബ്നത്തെയാണ് കുടുംബത്തിലെ ഏഴുപേരെ വെട്ടിക്കൊന്ന കേസില് തൂക്കിലേറ്റുന്നത്. 2008 ഏപ്രിലില് കുടുംബത്തിലെ ഏഴംഗങ്ങളെ കാമുകന്റെ സഹായത്തോടെ കോടാലികൊണ്ട് വെട്ടിക്കൊന്ന കേസിലാണ് വധശിക്ഷ.
ഉത്തര്പ്രദേശിലെ അംരോഹയില് ഭവന് ഖേദിയെന്ന ഗ്രാമത്തിലെ ഒരു സ്കൂളില് അധ്യാപികയായ ശബ്നം ഉന്നത വിദ്യാഭ്യാസമുള്ള സ്ത്രീയാണ്. ജ്യോഗ്രഫിയിലും ഇംഗ്ലീഷിലുമാണ് ശബ്നം എംഎ നേടിയത്. എന്നാല് ശബ്നം പ്രേമിച്ച സലീമാകട്ടെ നാലാം ക്ലാസ് തോറ്റവനും. ഈ പ്രണയത്തില് ശബ്നം ഗര്ഭിണിയാകുന്നതോടെയാണ് സലീമുമായി ഒരുമിച്ച് ജീവിക്കണമെന്ന മോഹം കലശലായത്. എന്തായാലും ഈ ബന്ധത്തെ അഭ്യസ്തവിദ്യരായ തന്റെ വീട്ടുകാര് എതിര്ക്കുമെന്ന് ശബ്നത്തിന് ഉറപ്പായിരുന്നു. ഇതേ തുടര്ന്നാണ് ഇരുവരും ഗൂഡാലോചന നടത്തി കൊലപാതകപദ്ധതി തയ്യാറാക്കിയത്. 2008 ഏപ്രില് 14ന് രാത്രിയാണ് ക്രൂരകൃത്യം നടത്തിയത്. കുടുംബാംഗങ്ങള്ക്കെല്ലാം പാലില് മയക്കുമരുന്നു ചേര്ത്ത് നല്കിയതിനു ശേഷമായിരുന്നു കൊടുംക്രൂരത. കാമുകനായ സലിമിനൊപ്പം ഷബ്നം സ്വന്തം മാതാപിതാക്കളെയും രണ്ട് സഹോദരന്മാരെയും സഹോദരഭാര്യയെയും സഹോദരിയെയും മരുമകനെയും മഴു ഉപയോഗിച്ച് വെട്ടിക്കൊല്ലുകയായിരുന്നു. രണ്ടുവര്ഷത്തെ വിചാരണയ്ക്കു ശേഷം അംരോഹ കോടതി 2010 ജൂലൈയില് ഷബ്നത്തിനും സലിമിനും വധശിക്ഷ വിധിച്ചു. പിന്നീട് മേല്കോടതികളിലെല്ലാം വധശിക്ഷ തന്നെ നല്കി. ഒടുവില് രാഷ്ട്രപതിയ്ക്ക് സമര്പ്പിച്ച ദയാഹര്ജി നിരസിക്കുകയും കേസില് ശബ്നത്തിന്റെ വധശിക്ഷ സുപ്രീംകോടതി ശരിവയ്ക്കുകയും ചെയ്തു.
ഉത്തര് പ്രദേശിലെ മഥുരയില് സ്ത്രീകളെ തൂക്കിലേറ്റാനുള്ള ഏക ജയിലിലാണ് ശിക്ഷ നടപ്പാക്കുന്നത്.
നിര്ഭയ കേസ് പ്രതികളെ തൂക്കിലേറ്റിയ ആരാച്ചാര് പവന് ജല്ലാദ് രണ്ടുതവണ നടപടിക്രമങ്ങള് പരിശോധിച്ചു. ശിക്ഷ നടപ്പാക്കുന്ന തിയതി തീരുമാനിച്ചിട്ടില്ല. ശബ്നത്തിനെതിരെ മരണവാറന്ഡ് പുറപ്പെടുവിച്ചു കഴിഞ്ഞു. ബിഹാറിലെ ബുക്സാറില് നിന്നാണ് തൂക്കുകയര് കൊണ്ടുവരുന്നത്.
സ്വതന്ത്ര ഇന്ത്യയുടെ ചരിത്രത്തില് ആദ്യമായാണ് ഒരു വനിതാ കുറ്റവാളിയെ തൂക്കിലേറ്റുന്നത്. വനിതകളുടെ വധശിക്ഷ നടപ്പാക്കാനുളള സംവിധാനം 150 വര്ഷം മുമ്പാണ് മധുരയില് നിര്മിച്ചത്. എന്നാല് ഇതുവരെ ഒരു വനിതയെയും തൂക്കിലേറ്റിയിട്ടില്ല.
