കൊട്ടാരക്കര: വരണമാല്യം ചാര്ത്തി പുതുജീവിതത്തിലേക്ക് പ്രവേശിച്ച വധൂവരന്മാര് ആ ധന്യമുഹൂര്ത്തത്തെ വിളക്കിചേര്ത്തത് അയോധ്യ ശ്രീരാമക്ഷേത്രവുമായി.
രാമക്ഷേത്രനിര്മാണത്തിനായി നിധിസമര്പ്പണം നടത്തികൊണ്ടാണ് നവദമ്പതികളായ ദീപക്കും ദേവികാദാസും മാതൃകയായത്. കൂടാതെ സാധുക്കളുടെ വിവാഹനടത്തിപ്പിലേക്ക് രാഷ്ട്രീയ സ്വയംസേവകസംഘം സേവാവിഭാഗ് നടത്തുന്ന മംഗല്യനിധിയിലേക്ക് സംഭാവന ചെയ്യാനും ഇരുവരും മറന്നില്ല. ഇന്നലെ പള്ളിക്കല് ദേവീക്ഷേത്രസന്നിധിയിലായിരുന്നു ആര്എസ്എസ് കൊട്ടാരക്കര ഖണ്ഡ് സഹകാര്യവാഹക് പള്ളിക്കല് കീഴൂട്ട് വീട്ടില് ദീപക്കും ദേവികാദാസും വിവാഹിതരായത്.
വിവാഹചടങ്ങിന് ശേഷം മംഗല്യനിധി ഏറ്റുവാങ്ങി ജില്ലാസംഘചാലക് ആര്. ദിവാകരന് വധൂവരന്മാരെ അനുഗ്രഹിച്ചു. രാമക്ഷേത്രനിര്മ്മാണത്തിനുള്ള തുക ധനസംഗ്രഹസമിതി വിഭാഗ് നിധിപ്രമുഖ് എസ്.അശോകന് ഏറ്റുവാങ്ങി. ജില്ലാ കാര്യവാഹക് പി.അനില് കുമാര്, ജില്ലാ സഹകാര്യവാഹക് രാജഗോപാല്, ഖണ്ഡ് കാര്യവാഹക് കെ.ആര്. വിനീഷ് എന്നിവര് ഒപ്പമുണ്ടായിരുന്നു.
