കൊല്ലം: നിയമസഭാ തെരഞ്ഞെടുപ്പിന് മുന്നൊരുക്കങ്ങള്ക്ക് ബിജെപി സമ്പൂര്ണ ജില്ലാസമിതി രൂപം നല്കി. സംസ്ഥാനത്തിന്റെ പ്രഭാരിയും മുന് എംപിയുമായിട്ടുള്ള സി.പി. രാധാകൃഷ്ണന് ഇതുമായി ബന്ധപ്പെട്ട് എല്ലാ മണ്ഡലങ്ങളിലും പര്യടനം നടത്തും. അദ്ദേഹം ബൂത്ത് കണ്വീനര് ഉപരി പ്രവര്ത്തകരുമായുള്ള യോഗങ്ങളില് പങ്കെടുക്കും.
ദീനദയാല് ഉപാദ്ധ്യായ അനുസ്മരണത്തോട് അനുബന്ധിച്ച് ജില്ലയിലെ മുഴുവന് ബൂത്തുകളിലും 10, 11, 12 തീയതികളില് സമര്പ്പണനിധി സമ്മേളനങ്ങള് നടക്കും. നാലു മുതല് ആറുവരെ ബൂത്തുകള് ഉള്പ്പെടുന്ന ശക്തികേന്ദ്രങ്ങള്ക്ക് പഞ്ചായത്ത് ജനറല് സെക്രട്ടറി ഉപരി നേതാക്കള് മേല്നോട്ടം വഹിക്കും.
ബൂത്ത് ലെവല് ഏജന്റുമാരുടെ ലിസ്റ്റ് പൂര്ത്തീകരിച്ചു. വോട്ടേഴ്സ് ലിസ്റ്റ് പ്രവര്ത്തനങ്ങള്ക്കായി പഞ്ചായത്തുതലത്തില് പാര്ട്ടി സംവിധാനത്തില് സെന്ററുകള് ആരംഭിച്ചു. മുഴുവന് നിയോജക മണ്ഡലങ്ങളിലും കോള് സെന്ററുകള് ആരംഭിച്ചു.
സംസ്ഥാന സര്ക്കാരിന്റെ ജനദ്രോഹ നടപടികള്ക്കെതിരേ 9ന് ജില്ലാകമ്മിറ്റിയുടെ നേതൃത്വത്തില് കളക്ട്രേറ്റ് മാര്ച്ചും തീരുമാനിച്ചു. 13 മുതല് 15 വരെ തീയതികളില് സംസ്ഥാനസര്ക്കാരിന്റെ അഴിമതികള്ക്കും സ്വജനപക്ഷപാതത്തിനും എതിരെയുമുള്ള പ്രചാരണവും, കേന്ദ്രസര്ക്കാര് നടപ്പാക്കുന്ന ജനക്ഷേമ പദ്ധതികളുടെ ലഘുലേഖയുമായി ഗൃഹസമ്പര്ക്കവും സംഘടിപ്പിക്കുമെന്ന് ജില്ലാ അദ്ധ്യക്ഷന് ബി.ബി. ഗോപകുമാര് അറിയിച്ചു.
