വാഷിംഗ്ടണ്‍: മ്യാന്‍മാറില്‍ സൈന്യം തടവിലാക്കിയ ഓംഗ് സാന്‍ സൂചിയും പ്രസിഡന്റ് വിന്‍ മിന്റിനെയും ഉടന്‍ മോചിപ്പിക്കണമെന്ന് അമേരിക്ക ആവശ്യപ്പെട്ടു. മോചിപ്പിച്ചില്ലെങ്കില്‍ നടപടിയുണ്ടാകുമെന്ന് യു.എസ് ഭരണകൂടം മ്യാന്‍മാര്‍ സൈന്യത്തിന് മുന്നറിയിപ്പ് നല്‍കി. തിരഞ്ഞെടുപ്പിലൂടെ അധികാരത്തിലെത്തുന്ന ജനാധിപത്യ ഭരണകൂടത്തെ അട്ടിമറിക്കാന്‍ അനുവദിക്കില്ലെന്ന് വൈ‌റ്റ്‌ഹൗസ് വക്താവ് ജെന്‍ സാക്കി അറിയിച്ചു.
തിരഞ്ഞെടുക്കപ്പെട്ട സര്‍ക്കാരിനെ അട്ടിമറിക്കാനുള‌ള ശ്രമത്തെ എതിര്‍ക്കുകയും അപലപിക്കുകയും ചെയ്യുന്നതായി വൈ‌റ്റ്‌ഹൗസ് വക്താവ് ജെന്‍ സാക്കി പറഞ്ഞു. മ്യാന്‍മാറില്‍ ജനാധിപത്യ മാനദണ്ഡങ്ങളും നിയമവാഴ്‌ചയും പാലിക്കപ്പെടണമെന്നും സാക്കി അറിയിച്ചു. സൂചിയ്‌ക്കും വിന്‍ മിന്റിനും പുറമേ നാഷണല്‍ ലീഗ് ഫോര്‍ ഡെമോക്ര‌േറ്റിക് പാര്‍ട്ടി എക്‌സിക്യൂട്ടീവ് അംഗമായ പാന്‍ താര്‍ മൈന്റും നിരവധി പ്രധാന നേതാക്കളും പ്രവിശ്യാ മുഖ്യമന്ത്രിമാരെയും സൈന്യം അറസ്‌റ്റ് ചെയ്‌തിട്ടുണ്ട്.
നവംബര്‍ മാസത്തില്‍ നടന്ന തിരഞ്ഞെടുപ്പില്‍ ഓങ് സാന്‍ സൂചിയുടെ പാര്‍ട്ടി തന്നെ വീണ്ടും വിജയിച്ചിരുന്നു. ഇവര്‍ ഉടനെ അധികാരത്തിലെത്താനിരിക്കെയാണ് തിരഞ്ഞെടുപ്പ് അട്ടിമറിച്ചെന്ന് കാട്ടി സൈനിക അട്ടിമറിയുണ്ടായിരിക്കുന്നത്. തിരഞ്ഞെടുപ്പില്‍ ആകെ 476 സീ‌റ്റുകളില്‍ 396ഉം നേടിയാണ് ഓങ് സാന്‍ സൂചിയുടെ നാഷണല്‍ ലീഗ് ഫോര്‍ ഡമോക്രസി വിജയിച്ചത്. സൈന്യം പിന്തുണച്ച യുഎസ്ഡിപിയ്‌ക്ക് നേടാനായത് 33 സീ‌റ്റുകള്‍ മാത്രമാണ്. തിരഞ്ഞെടുപ്പ് പരാജയം യുഎസ്‌ഡിപി അംഗീകരിക്കാതിരുന്നതിന് പിറകെയാണ് പട്ടാള അട്ടിമറിയില്‍ നാഷണല്‍ ലീഗ് ഫോര്‍ ഡമോക്രസി നേതാക്കള്‍ തടവിലായിരിക്കുന്നത്.
പ്രതികരിക്കാൻ ഇവിടെ എഴുതുക: