ന്യൂദല്ഹി : രാജ്യത്തെ ദശലക്ഷക്കണക്കിന് ആളുകള്ക്ക് പ്രചോദനമാകുന്ന ആശയങ്ങളാണ് മഹാത്മഗാന്ധിയുടേതെന്ന് പ്രധാനമന്ത്രി നരേന്ദ്രമോദി. രാഷ്ട്രപിതാവിന്റെ 73ാം ചരമ വാര്ഷികത്തില് ആദരാഞ്ജലികള് അര്പ്പിച്ചുകൊണ്ടുള്ള ട്വീറ്റിലാണ് ഇക്കാര്യം അറിയിച്ചത്.
മഹാത്മഗാന്ധിയുടെ ആദര്ശങ്ങള് ദശലക്ഷക്കണക്കിന് ആളുകളെ പ്രചോദിപ്പിക്കുന്നത് ഇനിയും തുടരും. രാജ്യത്തിന്റെ സ്വാതന്ത്ര്യത്തിനും ഓരോ ഭാരതീയന്റേയും ക്ഷേമത്തിനും സമൃദ്ധിക്കുമായി സ്വയം സമര്പ്പിച്ച മഹാന്മാരുടെ ത്യാഗത്തെ ഈ രക്തസാക്ഷി ദിനത്തില് സ്മരിക്കുന്നുവെന്നായിരുന്നു മോദിയുടെ ട്വീറ്റ്.
ചരമ വാര്ഷികത്തില് ഗാന്ധിജിയുടെ സമാധി സ്ഥലമായ രാജ്ഘട്ടിലെത്തി അദ്ദേഹം പുഷ്പ്പാര്ച്ചന നടത്തുകയും ചെയ്തു. പ്രധാനമന്ത്രിയെ കൂടാതെ ഉപരാഷ്ട്രപതി വെങ്കയ്യ നായിഡു, കേന്ദ്ര ആഭ്യന്തര മന്ത്രി അമിത് ഷാ, കേന്ദ്ര മന്ത്രി പ്രകാശ് ജാവദേക്കര് എന്നിവരും മഹാത്മാ ഗാന്ധിയ്ക്ക് ആദരവ് അര്പ്പിച്ചു. ഗാന്ധിയുടെ ജീവിതം മുഴുവന് മറ്റുള്ളവര്ക്ക് പ്രചോദനമാണ്. അദ്ദേഹത്തിന് ആദരാജ്ഞലികള് അര്പ്പിക്കുന്നതായി അമിത് ഷാ അറിയിച്ചു. അദ്ദേഹത്തിന്റെ ജീവിതത്തിന്റെ ഓരോ നിമിഷങ്ങളിലും എന്തെങ്കിലും നമുക്ക് പഠിക്കാനും മനസിലാക്കാനും ഉണ്ടായിരിക്കുമെന്ന് പ്രകാശ് ജാവദേക്കര് അറിയിച്ചു.
ബിജെപി ദേശീയാദ്ധ്യക്ഷന് ജെ പി നദ്ദയും ഗാന്ധിജിയ്ക്ക് ആദരവ് അര്പ്പിച്ചു. ലോകത്ത് സത്യം, അഹിംസ, ശുചിത്വം എന്നിവയുടെ സന്ദേശം നല്കിയ വ്യക്തിയാണ് ഗാന്ധിജി. സാമൂഹിക ഐക്യത്തേയും ഒത്തൊരുമയേയും കുറിച്ചുള്ള അദ്ദേഹത്തിന്റെ സന്ദേശങ്ങള് എല്ലാ മനുഷ്യര്ക്കും ഉപകാരപ്രദമാണെന്ന് ജെപി നദ്ദ പറഞ്ഞു.
