മുംബൈ: മഹരാഷ്‌ട്ര-കര്‍ണ്ണാടക അതിര്‍ത്തിയില്‍ മഹാരാഷ്‌ട്രക്കാര്‍ കൂടുതലുള്ള ബെല്‍ഗാം ഉള്‍പ്പെടെയുള്ള തര്‍ക്കപ്രദേശങ്ങള്‍ തല്‍ക്കാലം കേന്ദ്രഭരണത്തിന്‍ കീഴിലാക്കണമെന്ന് മഹാരാഷ്ട്ര മുഖ്യമന്ത്രി ഉദ്ദവ് താക്കറെ.
ഒരാഴ്ച മുന്‍പ് ഉദ്ദവ് താക്കറെ ഇതേ ആവശ്യം ഉന്നയിച്ചെങ്കിലും ഒരിഞ്ച് ഭൂമി പോലും വിട്ടുനല്‍കില്ലെന്ന് കര്‍ണ്ണാടകമുഖ്യമന്ത്രി യെദിയൂരപ്പ വ്യക്തമാക്കിയിരുന്നു. എന്നാല്‍ സുപ്രീംകോടതി വിധി വരുന്നതുവരെ തര്‍ക്കപ്രദേശങ്ങള്‍ കേന്ദ്രഭരണപ്രദേശങ്ങളാക്കി മാറ്റണമെന്ന വിവാദ പ്രസ്താവന ഉദ്ദവ് താക്കറെ ആവര്‍ത്തിച്ചു. രണ്ട് സംസ്ഥാനങ്ങള്‍ തമ്മിലുള്ള അതിര്‍ത്തിതര്‍ക്കം സംബന്ധിച്ചുള്ള പുസ്തകം പ്രകാശനം ചെയ്ത് സംസാരിക്കുകയായിരുന്നു ഉദ്ദവ്. എന്തുവിലകൊടുത്തും ഇത് നേടിയെടുക്കുമെന്നും ഉദ്ദവ് പറഞ്ഞു.
ഇപ്പോള്‍ ഈ തര്‍ക്കം സുപ്രീംകോടതിയുടെ പരിഗണനയിലാണ്. ഈ തര്‍ക്കപ്രദേശത്തുള്‍പ്പെട്ട ബെല്‍ഗാമിന്റെ പേര് ബെല്‍ഗാവി എന്നാക്കിമാറ്റാന്‍ കര്‍ണ്ണാടകസര്‍ക്കാരിന് എന്ത് അവകാശമാണുള്ളത്. കര്‍ണ്ണാടക ഇതിനെ രണ്ടാം തലസ്ഥാനമാക്കുകയും ഈവിടെ ഒരു ഭരണമന്ദിരം നിര്‍മ്മിക്കുകയും ചെയ്തു. എങ്ങിനെയാണ് സുപ്രീംകോടതിയുടെ പരിഗണനയിലിരിക്കുന്ന വിഷയത്തില്‍ ഇടപെടാന്‍ സംസ്ഥാനസര്‍ക്കാരിന് കഴിയുക?- ഉദ്ദവ് താക്കറെ ചോദിച്ചു. അതുകൊണ്ട് തര്‍ക്കം പരിഹരിക്കുന്നത് വരെ ഇതിനെ കേന്ദ്രഭരണപ്രദേശമാക്കി മാറ്റണം.
മറാത്തി സംസാരിക്കുന്നവര്‍ അധികമായുള്ള സ്ഥലങ്ങളാണ് ബെല്‍ഗാം, കാര്‍വാര്‍, നിപ്പാനി എന്നിവ. ഈ തര്‍ക്കപ്രദേശങ്ങള്‍ മഹാരാഷ്‌ട്രയുടെ ഭാഗമാക്കി മാറ്റണമെന്നതാണ് ശിവസേനയുടെ ആവശ്യം.
