പാലാ: കേസന്വേഷണത്തിന്റെ ഭാഗമായി എത്തിയ പോലീസുകാരെ ഈരാറ്റുപേട്ടയില് തടഞ്ഞു. സിപിഎം കൗണ്സിലറായ അനസ് പാറയലിന്റെ നേതൃത്വത്തിലുള്ള സംഘമാണ് പോലീസിനെ തടഞ്ഞത്. തുടര്ന്നുണ്ടായ സംഘര്ഷത്തില് നിരവധി പേര്ക്ക് പരുക്കേറ്റു. സംഘടിച്ച് പോലീസിനെ തടഞ്ഞവരെ പിരിച്ചുവിടാന് നടത്തിയ ലാത്തിച്ചാര്ജിലാണ് നിരവധി പേര്ക്ക് പരുക്കേറ്റത്.
ഇന്ന് ഉച്ചയോടെയാണ് സംഭവം നടന്നത്. യുവതിയുടെ പരാതിയെ തുടര്ന്ന് കേസ് അന്വേഷണവുമായി ബന്ധപ്പെട്ട് എത്തിയ പോലീസ് സംഘത്തെയാണ് അനസിന്റെ നേതൃത്വത്തിലുള്ള സംഘം തടഞ്ഞത്. ഇതോടെ പോലീസ് അനസിനെ തള്ളിമാറ്റി. തള്ളിമാറ്റിയപ്പോള് അനസ് വീഴുകയും ഇതിനെ തുടര്ന്ന് സംഘര്ഷം ഉണ്ടാവുകയും ചെയ്തു.
കൃത്യനിര്വഹണം തടസപ്പെടുത്താന് ശ്രമിച്ചെന്നാരോപിച്ചാണ് പോലീസ് അനസിനെ തള്ളിമാറ്റിയത്. തെക്കേക്കര സ്വദേശിനിയായ യുവതിയുടെ പരാതിയില് ആണ് പോലീസ് ഒരാളെ കസ്റ്റഡിയില് എടുക്കാന് ഇവിടെയെത്തിയത്. എന്നാല് അകാരണമായിട്ടാണ് യുവാവിനെ കസ്റ്റഡിയിലെടുക്കുന്നത് എന്നാരോപിച്ച് അനസ് പോലീസിനെ തടയുകയായിരുന്നു. കണ്ടാലറിയാവുന്നവര്ക്കെതിരെ പോലീസ് കേസെടുത്തിട്ടുണ്ട്.
