തിരുവനന്തപുരം: റെയില്വേ മേല്പ്പാലങ്ങള് പണിയാനുള്ള മുഖ്യമന്ത്രിയുടെ പദ്ധതിയെ വിമര്ശിച്ച് ആര്എസ്പി നേതാവ് എന്.കെ. പ്രേമചന്ദ്രന്.
‘മുഖ്യമന്ത്രി റെയില്വേയില് നിന്ന് ഇക്കാര്യത്തില് മുന്കൂര് അനുതി വാങ്ങിയിട്ടില്ല. റെയില്വേയില് നിന്നും മുന്കൂര് അനുമതി വാങ്ങാതെ എങ്ങിനെയാണ് മുഖ്യമന്ത്രിയ്ക്ക് മേല്പ്പാലങ്ങള് പണിയാന് കഴിയുക?’ പ്രേമചന്ദ്രന് ചോദിച്ചു.
സംസ്ഥാനത്ത് വിവിധ ജില്ലകളിലായി 10 റെയില്വേ മേല്പ്പാലങ്ങളുടെ നിര്മ്മാണോദ്ഘാടനം മുഖ്യമന്ത്രി പിണറായി വിജയന് ശനിയാഴ്ച നിര്വ്വഹിച്ചിരുന്നു. ചിറയിന്കീഴ്, മാളിയേക്കല് (കരുനാഗപ്പള്ളി), ഇരവിപുരം, ഗുരുവായൂര്, ചിറങ്ങര (ചാലക്കുടി), അകത്തേത്തറ (മലമ്പുഴ), വാടാനാംകുറിശ്ശി (പട്ടാമ്പി), താനൂര്-തെയ്യാല, ചേലാരി-ചെട്ടിപ്പടി (തിരൂരങ്ങാടി), കൊടുവള്ളി (തലശ്ശേരി) എന്നിവിടങ്ങളിലാണ് മേല്പ്പാലങ്ങള് നിര്മ്മിക്കുന്നത്.
251.48 കോടി രൂപ മുതല് മടക്ക് പ്രതീക്ഷിക്കുന്ന ഈ പ്രവൃത്തികളുടെ നിര്മ്മാണം റോഡ്സ് ആന്റ് ബ്രിഡ്ജസ് ഡവലപ്മെന്റ് കോര്പറേഷനാണ് ഏറ്റെടുത്തിരിക്കുന്നത്. കിഫ്ബി ഫണ്ട് ഉപയോഗപ്പെടുത്തിയുള്ള ഈ നിര്മ്മാണം ഒരു വര്ഷത്തിനുള്ളില് പൂര്ത്തിയാക്കാനാണ് ഉദ്ദേശിക്കുന്നത്.
