കൊച്ചി: ഡോളര് സ്വര്ണ്ണക്കടത്ത് കേസില് വീണ്ടും സ്പീക്കറെ ബന്ധത്തിലുള്ള കണ്ണികളെ വിടാതെ പിടികൂടി കസ്റ്റംസ്. സ്പീക്കര് ശ്രീരാമകൃഷ്ണന്റെ സുഹത്തും വിദേശ വ്യവസായിയും മസ്കറ്റിലെ മിഡില് ഈസ്റ്റ് കോളെജ് ഉടമയുമായ ലഫീര് മുഹമ്മദിനെയാണ് വ്യാഴാഴ്ച കസ്റ്റംസ് ചോദ്യം ചെയ്ത് തുടങ്ങിയത്.
വിദേശത്തേക്ക് നയതന്ത്രചാനല് വഴി ഡോളര് കടത്തിയ കേസില് പ്രതിസ്ഥാനത്തുള്ള ഈജിപ്തിലെ പൗരനില് നിന്നും ലഫീര് മുഹമ്മദ് ഡോളര് വാങ്ങിയെന്ന കണ്ടെത്തിയതിന്റെ അടിസ്ഥാനത്തിലാണ് ചോദ്യം ചെയ്യല്. നേരത്തെ ശിവശങ്കര് സ്വപ്നയെ ലഫീര് മുഹമ്മദിന്റെ ഉടമസ്ഥതയിലുള്ള വിദ്യാഭ്യാസസ്ഥാപനത്തില് ജോലിക്ക് കയറ്റാന് ശ്രമിച്ചിരുന്നതായി വാര്ത്തയുണ്ടായിരുന്നു. തൊഴിലിനായി സ്വപ്ന ഇവിടെ ഒരു അഭിമുഖത്തില് പങ്കെടുത്തതായും പറയപ്പെടുന്നു.. അതായത് ശിവശങ്കറിനും ഈ വ്യവസായിയുമായി ഉറ്റബന്ധമുണ്ടായിരുന്നെന്ന വസ്തുതയിലേക്കാണ് ഇത് വിരല്ചൂണ്ടുന്നത്. ഇദ്ദേഹം മസ്കറ്റില് ആരംഭിക്കാനിരുന്ന വിദ്യാഭ്യാസസ്ഥാപനത്തില് കേരളത്തിലെ പല ഉന്നതര്ക്കും ബിനാമി നിക്ഷേപമുണ്ടെന്നും ആരോപണമുണ്ട്.
വ്യാഴാഴ്ച ഉച്ചയ്ക്ക് 12മണിയോടെയാണ് ലഫീര് മുഹമ്മദ് കസ്റ്റംസ് ഓഫീസില് എത്തിയത്. ചോദ്യം ചെയ്യുമ്പോള് അസി.പ്രൊട്ടോക്കോള് ഓഫീസറെ ഭീഷണിപ്പെടുത്തിയിരുന്നു എന്ന മുഖ്യമന്ത്രിയുള്പ്പെടെയുള്ളവരുടെ ആരോപണം മുഖവിലക്കെടുക്കാതെയാണ് കസ്റ്റംസ് ഡോളര്-സ്വര്ണ്ണക്കടത്ത് കേസില് മുന്നോട്ട് പോകുന്നത്.
