ചവറ: ചവറയില് കെ.ബി. ഗണേഷ് കുമാര് എംഎല്എക്ക് നേരെ കരിങ്കൊടി കാണിച്ച ആറു യൂത്ത് കോണ്ഗ്രസ് പ്രവര്ത്തകരെ കയ്യേറ്റം ചെയ്യാന് ഡിവൈഎഫ്ഐ ശ്രമം.
ചവറ പോലീസ് സ്റ്റേഷനില് എത്തിച്ച ആറ് യൂത്ത് കോണ്ഗ്രസുകാര്ക്കും ജാമ്യം നല്കരുതെന്ന് ആവശ്യപ്പെട്ടാണ് സംഘടിച്ചെത്തിയ ഡിവൈഎഫ്ഐ-സിപിഎം സംഘം സ്റ്റേഷനിലെത്തിയത്. ഇവര് പോലീസ് സ്റ്റേഷനിലേക്ക് ഇരച്ച് കയറിയതോടെ സംഘര്ഷമുണ്ടായി. ഇതില് എഎസ്ഐ മണികണ്ഠന് പരിക്കേറ്റു.
ഞായറാഴ്ച വൈകിട്ട് 5.45ന് ചവറ തട്ടാശ്ശേരിയ്ക്ക് സമീപമാണ് കരിങ്കൊടി കാണിച്ചത്. 21ന് ഉപതെരഞ്ഞെടുപ്പ് നടക്കുന്ന പന്മന പഞ്ചായത്തിലെ പറമ്പിമുക്ക്, ചോല വാര്ഡുകളിലെ പ്രചാരണത്തിനു ചവറയിലെത്തിയതായിരുന്നു എംഎല്എ. യൂത്ത് കോണ്ഗ്രസ് പ്രവര്ത്തകര് കരിങ്കൊടി കാണിച്ച് എംഎല്എയുടെ വാഹനത്തിന് മുന്നിലേക്ക് ചാടി വീണു. തുടര്ന്ന് നടന്ന സംഘര്ഷത്തില് വാഹനത്തിന്റെ ചില്ല് തകര്ന്നു. ഇവിടെ നിന്നും ആറ് യൂത്ത് കോണ്ഗ്രസ് പ്രവര്ത്തകരെ ചവറ പോലീസ് അറസ്റ്റ് ചെയ്തു. യൂത്ത് കോണ്ഗ്രസ് പ്രവര്ത്തകരായ മുനീര്, ഷെബീര് ഖാന്, അതുല്, രതീഷ്, റിനോഷ, ഷെമീര് എന്നിവരെയാണ് അറസ്റ്റ് ചെയ്തത്.
സംഘര്ഷമുണ്ടാകുമെന്ന സൂചനയുണ്ടായിരുന്നതിനാല് കൂടുതല് പോലീസ് സ്ഥലത്തുണ്ടായിരുന്നു. എന്നാല് പൊലീസിനെ മറികടന്ന് യൂത്ത് കോണ്ഗ്രസ് പ്രവര്ത്തകര് കാര് തടയുകയായിരുന്നു. ഗണേഷ്കുമാര് എംഎല്എയ്ക്ക് പിന്തുണയുമായി ചവറയിലെ ഡിവൈഎഫ്ഐക്കാര് സ്ഥലത്ത് സംഘടിച്ചതോടെ പ്രദേശത്ത് ഏറേ നേരം സംഘര്ഷം നിലനിന്നിരുന്നു.
