തിരുവനന്തപുരം: സംസ്ഥാനത്ത് കൊറോണയെ പിടിച്ചു കെട്ടിയെന്ന് പിആര് ഏജന്സിയെ വെച്ച് പ്രചാരണം നടത്തി ഇടത് സര്ക്കാര് ജനങ്ങളെ തെറ്റിദ്ധരിപ്പിക്കുകയാണെന്ന് കേന്ദ്രമന്ത്രി വി. മുരളീധരന്. കേരളത്തില് കോവിഡ് നിയന്ത്രണ വിധേയമാണെന്ന് സര്ക്കാര് പറയുന്നത് തെറ്റാണ്. തിരുവനന്തപുരത്ത് വാര്ത്താ സമ്മേളനത്തില് സംസാരിക്കുകയായിരുന്നു അദ്ദേഹം.
രാജ്യത്തെ കോവിഡ് രോഗികളില് 40 ശതമാനം കേരളത്തില് ആണ്. എന്നിട്ടും പ്രതിരോധ പ്രവര്ത്തനങ്ങളില് ഒന്നാമതാണെന്നാണ് കേരളം പ്രചാരണം നടത്തുന്നത്. ഇത് എന്തടിസ്ഥാനത്തിലാണെന്ന് മനസ്സിലാകുന്നില്ല. രോഗികളുടെ സമ്പര്ക്കപ്പട്ടിക ആരോഗ്യവകുപ്പ് തയ്യാറാക്കുന്നില്ല. ഹോം ക്വാറന്റൈന് നടപ്പാക്കുന്നതിലും സര്ക്കാര് പരാജയമാണ്. കൊറോണ വൈറസ് ബാധിച്ച് മരിക്കുന്നവരുടെ എണ്ണം ബോധപൂര്വ്വം സംസ്ഥാന സര്ക്കാര് കുറച്ചു കാണിക്കുകയാണെന്നും കേന്ദ്രമന്ത്രി കുറ്റപ്പെടുത്തി.
സംസ്ഥാനത്ത് പ്രതിപക്ഷവും ഭരണപക്ഷവും ഒത്തുകളിക്കുകയാണോയെന്ന് സശയുമുണ്ട്. സര്ക്കാരിന്റെ ഭാഗത്ത് നിന്നുള്ള വീഴ്ചകള് പ്രതിപക്ഷം ചൂണ്ടിക്കാട്ടുന്നില്ല. ഫാഷന് മാഗസിനുകളുടെ മുഖചിത്രമാകാനാണ് ആരോഗ്യമന്ത്രിക്ക് താത്പ്പര്യം.ജനങ്ങളുടെ ആരോഗ്യത്തിനല്ല മറിച്ച് മേനി നടിക്കുന്നതിലാണ് സര്ക്കാര് പ്രാധാന്യം നല്കുന്നത്.
സംസ്ഥാനത്തെ കോവിഡ് ടെസ്റ്റുകള് അപര്യാപ്തമാണ്. രോഗവ്യാപനത്തിലേക്ക് വീണ്ടും മടങ്ങിപ്പോകുന്ന സ്ഥിതിവിശേഷമാണ് ഉള്ളത്. വീഴ്ചയുടെ ഉത്തരവാദിത്തം ആരോഗ്യ മന്ത്രിക്കാണോ മുഖ്യമന്ത്രിക്കാണോയെന്ന് സര്ക്കാര് വ്യക്തമാക്കണം. ഇതിനായി അടിയന്തിര നടപടികള് കൈക്കൊള്ളുകയും വേണം. രോഗ വ്യാപനം സംബന്ധിച്ച വസ്തുതകള് ജനങ്ങളോട് വിശദീകരിക്കാന് സര്ക്കാര് തയ്യാറാകണം. പരാജയത്തിന്റെ ഉത്തരവാദിത്തം കൂടി ഏറ്റെടുക്കാന് തയ്യാറാകണമെന്നും കേന്ദ്രമന്ത്രി കൂട്ടിച്ചേര്ത്തു.
