കാഞ്ഞങ്ങാട്: ഗെയില്‍ പൈപ്പ് വഴി വീടുകളില്‍ പാചകവാതകമെത്തിക്കാനുള്ള സിറ്റി ഗ്യാസ് പൈപ്പ് ലൈന്‍ പാകലിന്റെ ആദ്യഘട്ടം കാഞ്ഞങ്ങാട്ട് പുരോഗമിക്കുന്നു. തുടക്കത്തില്‍ 330 കിലോമീറ്റര്‍ പൈപ്പ് ലൈനാണ് സ്ഥാപിക്കുന്നത്. കഴിഞ്ഞ മാസമാണ് പ്രവൃത്തി തുടങ്ങിയത്. അമ്പലത്തറ കോട്ടപ്പാറയിലെ ടെര്‍മിനിലില്‍ നിന്ന് മാവുങ്കാല്‍ മൂലക്കണ്ടം വെള്ളിക്കോത്ത് വഴി മാണിക്കോത്ത് വരെ പൈപ്പ് സ്ഥാപിക്കുകയാണിപ്പോള്‍.
കെഎസ്ടിപി റോഡില്‍ നിന്ന് തെക്കുഭാഗത്തേക്ക് പടന്നക്കാട്ടു വരെയും വടക്കോട്ട് ചിത്താരി പാലം വരെയുമുള്ള 19 കിലോമീറ്റര്‍ കുഴിയെടുത്ത് പൈപ്പ് ലൈന്‍ ഇറക്കി ഇവ കൂട്ടിയോജിപ്പിക്കുന്ന വെല്‍ഡിംഗ് ജോലികളാണ് നടക്കുന്നത്. ഇതോടൊപ്പം പ്രാധാന പൈപപ്പ് ലൈനില്‍നിന്ന് വലിപ്പം കുറഞ്ഞ പൈപ്പുകളിലൂടെയുള്ള പാചകവാതകലൈനുകളും സ്ഥാപിക്കുന്നുണ്ട്.
മൂലക്കണ്ടം മഡിയന്‍ റോഡില്‍ നവീകരണത്തിന് മുമ്പായി പൈപ്പിടല്‍ പൂര്‍ത്തീകരിക്കാനായി. നാലുകിലോമീറ്റര്‍ പൈപ്പ് പാകല്‍ പൂര്‍ത്തിയായി. കുടിവെള്ളലൈന്‍, ടെലിഫോണ്‍ കേബിളുകള്‍ എന്നിവക്ക് കേടുപാടുകള്‍ സംഭവിക്കാതിരിക്കാന്‍ ബന്ധപ്പെട്ടവരുടെ സാന്നിദ്ധ്യത്തിലാണ് പൈപ്പ് പാകല്‍. രണ്ടാം ഘട്ടത്തില്‍ കാസര്‍കോട്ടും നീലേശ്വരത്തേക്കും പൈപ്പ് ലൈന്‍ നീട്ടും.
പ്രധാന പൈപ്പ് ലൈന്‍ ഗെയിലും വീടുകളിലേക്കുള്ള ഉപശൃംഖലകള്‍ ഐഒസിയും അദാനി ഗ്രൂപ്പും ചേര്‍ന്നാണ് ചെയ്യുന്നത്. അജാനൂര്‍ പഞ്ചായത്തിലും കാഞ്ഞങ്ങാട് നഗരസഭയിലുമാണ് ആദ്യം സിറ്റി ഗ്യാസ് എത്തുക. എല്‍പിജി ഗ്യാസിനേക്കാള്‍ വിലകുറവിലാണ് പ്രകൃതി വാതകകണക്ഷന്‍ ലഭിക്കുക. കുടിവെള്ള പൈപ്പ് ലൈന്‍ പോലെയാണ് വീടുകളില്‍ കണക്ഷന്‍ നല്‍കുക. വാഹനങ്ങളില്‍ പാചകവാതകം നിറക്കാനുള്ള പമ്പുകളുമുണ്ടായിരിക്കും.
പ്രതികരിക്കാൻ ഇവിടെ എഴുതുക: