തിരുവനന്തപുരം: കുടിയൊഴിപ്പിക്കാനെത്തിയവര്‍ക്ക് മുന്നില്‍ ആത്മഹത്യാ ഭീഷണി മുഴക്കുന്നതിനിടെ പൊള്ളലേറ്റ് മരിച്ച രാജൻ താമസിച്ച ഭൂമിയെപ്പറ്റി റവന്യൂവകുപ്പ് അന്വേഷണം തുടങ്ങി. രാജന്റെ മക്കൾ തിരുവനന്തപുരം ജില്ലാ കളക്ടർക്ക് നൽകിയ പരാതിയിലാണ് അന്വേഷണം. പരാതിയെക്കുറിച്ച് അന്വേഷിച്ച് റിപ്പോർട്ട് സമർപ്പിക്കാൻ നെയ്യാറ്റിൻ‌കര തഹസിൽദാരിനോട് നിർദേശിക്കുകയായിരുന്നു.
അയൽ‌വാസി വസന്തയുടെ പട്ടയം വ്യാജമാണോ എന്നാണ് തഹസിൽ‌ദാർ പരിശോധിക്കുന്നത്. കണ്ടെത്തലുകൾ കളക്ടർ റിപ്പോർട്ടായി സർക്കാരിന് സമർപ്പിക്കും. ഇതേ ഭൂമി തന്നെ രാജന്റെ മക്കൾക്ക് നൽകാനാവുമോ എന്നാണ് സർക്കാർ നോക്കുന്നത്. രാജന്റെ മരണത്തിൽ പോലീസുകാർക്ക് വീഴ്ചയുണ്ടായോ എന്ന കാര്യത്തിൽ തിരുവനന്തപുരം റൂറൽ എസ്‌പിയും അന്വേഷണം തുടങ്ങിയിട്ടുണ്ട്.
അതേസമയം രാജന്റെ ഭാര്യ അമ്പിളിയുടെ മൃതദേഹം തടഞ്ഞുവെച്ച് പ്രതിഷേധിച്ചവർക്കെതിരെ പോലീസ് കേസെടുത്തു. കണ്ടാലറിയാവുന്ന മുപ്പതോളം പേർക്കെതിരെയാണ് കേസ്. രാജനെതിരെ നേരത്തെതന്നെ കേസെടുത്തിരുന്നു.
പ്രതികരിക്കാൻ ഇവിടെ എഴുതുക: