ചൂട്

സുഗതകുമാരി

കൊടും ചൂടാണ്, വറ്റുന്നൂ

കിണറും നോറ്റ കണ്‍കളും

കിടാവിന്നായ് ചുരത്തേണ്ട

നെഞ്ഞും താരാട്ടു കൊഞ്ചലും

ആരുവറ്റിച്ചതീ വറ്റാ-

ക്കിണറെ, ക്കാട്ടു പൊയ്‌കയെ

ആരുകത്തിച്ചതീപ്പുന്നെല്‍-

പ്പാടത്തിന്‍ ഹരിതാഭയെ?

ലോറിയില്‍ തിക്കിയേറ്റുന്ന

കന്നുകാലികളെന്നപോല്‍

ആരീ മലകളെ കൊന്നു

കൊണ്ടുപോകുന്നു ചന്തയില്‍?

വെട്ടിക്കത്തിപ്പതാരാണീ

നാടിന്‍ പച്ചക്കിനാവുകള്‍

കുത്തിപ്പൊട്ടിച്ചതാരാണീ

പച്ചക്കുന്നിന്റെ കണ്ണുകള്‍?

വറ്റിച്ചൂറ്റിയതാരാണീ-

യമ്മ നൂറ്റാണ്ടു കാലമായ്

മക്കള്‍ക്കായിക്കുഴിച്ചിട്ടോ-

രടിവെള്ള മഹാനിധി!

നാലുപാടും പരിഭ്രാന്തം  

നോക്കും തെങ്ങുകളെ, മണല്‍

ച്ചാലുപോല്‍ വീണുചാകുന്നോ-

രോമല്‍ പുഴകളെ, കരി-

ഞ്ചായലില്‍ തീപിടിച്ചോരു

ഗിരിശൃംഗങ്ങളെ, ദാഹ-

നീരിനായ് കാടിറങ്ങുന്ന

പാവം സഹ്യന്റെ മക്കളെ

പാലക്കാടിന്‍ മരുച്ചൂടില്‍

തനിയെ നിന്നു കത്തിടും

നീലപ്പനകളെ,നിങ്ങ-

ളെല്ലാമിതിനു സാക്ഷികള്‍!

അംബ, നിന്റെ മുലപ്പാല-

ല്ലിവരൂറ്റുന്നു നിത്യവും

നിന്റെ രക്തം നിന്റെ മാംസം

നീ ഞങ്ങള്‍ക്കൊരു പെണ്ണിര

അമ്മ തന്റെ തലയ്‌ക്കല്‍ കാ-

ത്തിരിക്കുമ്പോള്‍, തളര്‍ന്നൊരെന്‍

കണ്ണുകള്‍ വാനിലേയ്‌ക്കുറ്റു

നോക്കിടുന്നു ഭയാകുലം

കണ്ണെഴുതും നെടും മഞ്ഞ-

ക്കുറിയും ചേര്‍ന്ന മേഘമൊ-

ന്നെങ്ങാനും കാണുവാനുണ്ടോ

കാറ്റേ വിണ്ണേ സമുദ്രമേ?