ന്യു ഹാംപ്ഷയർ ഹൗസ് സ്പീക്കർ ഡിക് ഹിൻച്ച് കോവിഡ് ബാധിച്ച് മരിച്ചു

ന്യു ഹാംപ്ഷയർ: നവംബർ പൊതുതിരഞ്ഞെടുപ്പിൽ ന്യു ഹാംപ്ഷയർ സംസ്ഥാനത്ത് അത്യുജ്വല വിജയം കൈവരിച്ച റിപ്പബ്ലിക്കൻ പാർട്ടിയുടെ കരുത്തനായ നേതാവും പുതിയതായി തിരഞ്ഞെടുക്കപ്പെട്ട ഹൗസ് സ്പീക്കറുമായ ഡിക്ഹിൻച്ച് (71) കോവിഡ് ബാധിച്ച് മരിച്ചു. ഡിസംബർ 9 ബുധനാഴ്ചയാണ് അന്തരിച്ചതെങ്കിലും വ്യാഴാഴ്ച ന്യുഹാംപ്ഷയർ ചീഫ് മെഡിക്കൽ എക്സാമിനറുടെ ആട്ടോപ്സി റിസർട്ട് ലഭിച്ചതിനുശേഷമാണ് മരണകാരണം കോവിഡ് 19 മൂലമാണെന്ന് ഔദ്യോഗികമായി അറിയിച്ചത്.  

സംസ്ഥാന അറ്റോർണി ജനറൽ ഗോർഡൻ മക്ക് ഡൊണാൾഡ് മരണം സ്ഥിരീകരിച്ചു. ഡിസംബർ 2നാണ് അവസാനമായി യൂണിവേഴ്സിറ്റി ഓഫ് ന്യു ഹാംപ്ഷെയറിനു പുറത്തു സംഘടിപ്പിച്ച ലെജിസ്ലേറ്റീവ് സെഷനിൽ ഹിൻച് പ്രസംഗിച്ചത്. അന്നു തന്നെയാണ് ഹൗസ് സ്പീക്കറായി തിരഞ്ഞെടുക്കപ്പെട്ടതും. നവംബറിൽ നടന്ന പൊതുതിരഞ്ഞെടുപ്പിൽ അട്ടിമറി വിജയത്തിലൂടെ ഡെമോക്രാറ്റിക് പാർട്ടിയെ പരാജയപ്പെടുത്തി സ്റ്റേറ്റ് ഹൗസിലും സ്റ്റേറ്റ് സെനറ്റിലും ഭൂരിപക്ഷം ലഭിച്ചത് ഡിക്കിന്റെ നേതൃത്വത്തിലായിരുന്നു.

2015–2018 കാലഘട്ടത്തിൽ സ്റ്റേറ്റ് ഹൗസ് ലീഡറായും ഡിക്ക് പ്രവർത്തിച്ചിരുന്നു. ഡിസംബർ രണ്ടിന് മുമ്പുള്ള ആഴ്ചയിൽ ഇൻഡോർ ജിഒപി കോക്കസ് മീറ്റിംഗിൽ പങ്കെടുത്ത നിരവധി റിപ്പബ്ലിക്കൻ ഹൗസ്മെമ്പേഴ്സിനും കോവിഡ് പരിശോധനാ ഫലം പോസിറ്റീവായിരുന്നു. ഡിക്ക് ഡെപ്യൂട്ടിയായി നിയമിച്ചിരുന്ന ഷെർമെൻ പാക്കേഡ് സ്പീക്കറുടെ താൽക്കാലിക ചുമതല വഹിക്കും.