കുന്നത്തൂര്‍: ആര്‍എസ്എസുകാരനായതിന്റെ പേരില്‍ ചായക്കടകളില്‍ നിന്നുപോലും ആട്ടിയകറ്റപ്പെട്ട ആളാണ് പോരുവഴി കമ്പലടി പോക്കാട്ട് കിഴക്കതില്‍ രാഘവന്‍നായര്‍ (80). ഇന്ന് നാടിന്റെ ഭരണഗതി നിര്‍ണയിക്കുന്നതിലും കമ്യൂണിസ്റ്റ്-കോണ്‍ഗ്രസ് നേതൃത്വം ഭയപ്പെടുന്ന ശക്തിയായി തന്റെ പ്രസ്ഥാനം മാറിയതിലുമുള്ള രാഘവന്‍ ചേട്ടന്റെ സന്തോഷം വിവരണാതീതമാണ്.
65 വര്‍ഷത്തോളം പഴക്കമുള്ള സംഘ ബന്ധവും ജനസംഘവുമായുള്ള രക്തബന്ധവും വിവരിക്കുമ്പോള്‍ രാഘവേട്ടന്‍ പ്രായമൊക്കെ മറക്കും. അക്കാലത്ത് പൊതുസമൂഹത്തില്‍ നിന്നും മാറ്റി നിര്‍ത്തപ്പെടേണ്ടി വന്നപ്പോഴും വിശ്വസിച്ച പ്രസ്ഥാനം നാടിന്റെ കരുത്താവുന്ന കാലം അതിവിദൂരമല്ലന്ന് ഉറപ്പിച്ചിരുന്നു രാഘവന്‍പിള്ള. തദ്ദേശ തെരഞ്ഞെടുപ്പില്‍ പോലും മത്സരിക്കാന്‍ ആളുകളെ കിട്ടാതിരുന്ന കാലഘട്ടത്തിലും മത്സരിക്കാന്‍ തയ്യാറായി.
കഴിഞ്ഞ തെരഞ്ഞെടുപ്പില്‍ പോരുവഴി പഞ്ചായത്തിലെ മുഖ്യ പ്രതിപക്ഷകക്ഷിയായി ബിജെപി എത്തിയതില്‍ രാഘവേട്ടനുമുണ്ട്. വരുന്ന തെരഞ്ഞെടുപ്പില്‍ ബിജെപി സ്ഥാനാര്‍ഥികളായി മത്സരിക്കുന്നവര്‍ രാഘവന്‍പിള്ളയെ വീട്ടിലെത്തി ആദരിച്ചു. അദ്ദേഹത്തിന്റെ അനുഗ്രഹം നേടിയാണ് ബിജെപി സ്ഥാനാര്‍ഥികള്‍ പ്രചരണ രംഗത്തേക്ക് കടന്നത്.
പ്രതികരിക്കാൻ ഇവിടെ എഴുതുക: