ഇടുക്കി: അറബിക്കടലിലും ബംഗാള് ഉള്ക്കടലിലും ന്യൂനമര്ദ സാധ്യതയുള്ളതിനാല് തുലാമഴ ഇന്ന് മുതല് ഭാഗീകമായി സജീവമാകാന് സാധ്യത. തെക്കന് കേരളത്തിലാണ് കൂടുതല് മഴ സാധ്യതയുള്ളത്. മിക്കയിടത്തും ആകാശം മേഘാവൃതമായിരിക്കും.
മദ്ധ്യ കേരളത്തില് ഇടത്തരം മഴയും പ്രതീക്ഷിക്കാം. വടക്കന് കേരളത്തില് ഇടിയോട് കൂടിയ മഴയ്ക്കാണ് സാധ്യത. ബുധന്, വ്യാഴം ദിവസങ്ങളിലും മദ്ധ്യ-വടക്കന് കേരളത്തിലെ ചിലയിടങ്ങളില് മഴ തുടരും. എന്നാല് അതി ശക്തമായ മഴയ്ക്ക് എവിടേയും സാധ്യത നിലവില് ഇല്ല. 20ന് ശേഷം രൂപമെടുക്കുന്ന ന്യൂനമര്ദങ്ങളും ന്യൂനമര്ദ പാത്തിയുമാണ് നിലവിലെ മഴ സാധ്യത വര്ദ്ധിപ്പിച്ചത്. എന്നാല് ന്യൂനമര്ദങ്ങള് കേരളത്തെ ബാധിക്കില്ലെന്നാണ് സ്വകാര്യ കാലാവസ്ഥ നിരീക്ഷണ കേന്ദ്രമായ മെറ്റ് ബീറ്റ് വെതര് പറയുന്നത്. തമിഴ്നാട് തീര മേഖലയില് ശക്തമായ മഴ ലഭിച്ചേക്കാം.
കേരളത്തിന്റെ തെക്കന് ജില്ലകളിലും മഴയ്ക്ക് സാധ്യതയുണ്ടെന്നും ഇത് സംബന്ധിച്ച് കൂടുതല് വ്യക്തത വരും ദിവസങ്ങളിലേ ലഭിക്കുവെന്നും മെറ്റ് ബീറ്റ് വെതര് വ്യക്തമാക്കുന്നു. അതേ സമയം ഐഎംഡി ഇന്ന് ഏഴ് ജില്ലകളില് യെല്ലോ അലര്ട്ട് പ്രഖ്യാപിച്ചു. ഒറ്റപ്പെട്ട ശക്തമായ മഴയ്ക്കാണ് ഇവിടങ്ങളില് സാധ്യത. ഇതുവരെ തുലാമഴയില് 34% കുറവാണുള്ളത്. മലപ്പുറത്താണ് ഏറ്റവും അധികം മഴ കുറഞ്ഞത് 62%.
ജന്മഭൂമി ഓണ്ലൈന്