ആയൂര്: രണ്ട് ദിവസം മുന്പ് കൊല്ലം ആയൂരില് നിന്ന് കാണാതായ രണ്ട് പെണ്കുട്ടികളുടെ മൃതദേഹങ്ങള് കായലില് നിന്ന് ലഭിച്ചു. ആയൂര് അറയ്ക്കല് സ്വദേശിനി അമൃത, ആയൂര് സ്വദേശിനി ആര്യ ജി അശോക് എന്നിവരുടെ മൃതദേഹങ്ങളാണ് ലഭിച്ചത്. അമൃതയുടെ മൃതദേഹം ചേര്ത്തല പാണാവള്ളി പഞ്ചായത്തിനടുത്തുള്ള ഊടുവിള എന്ന് സ്ഥലത്ത് നിന്നും ആര്യയുടെ മൃതദേഹം മേക്കര കായലില് നിന്നുമാണ് ലഭിച്ചത്. ഫയര്ഫോഴ്സും പോലീസും സംയുക്തമായി നടത്തിയ തിരച്ചിലിലാണ് മൃതദേഹങ്ങള് ലഭഫിച്ചത് .പോസ്റ്റുമോര്ട്ടം നടപടികള് പൂര്ത്തിയായ ശേഷം മൃതദേഹങ്ങള് നാട്ടിലേക്ക് എത്തിക്കും.
രണ്ട് ദിവസം മുന്പാണ് ആയൂര് അറയ്ക്കല് സ്വദേശിനി അമൃത, ആയൂര് സ്വദേശിനി ആര്യ ജി അശോക് എന്നിവരെ കാണാതാകുന്നത്. ബിരുദ വിദ്യാര്ഥികളായ ഇരുവരും സര്ട്ടിഫിക്കറ്റ് ആവശ്യത്തിനായി അഞ്ചല് കോളേജിലേക്ക് പോകാനെന്ന വ്യാജേനയാണ് വീട്ടില് നിന്നും ഇറങ്ങിയത്. തുടര്ന്ന് ഇരുവരെയും കാണാതാകുകയായിരുന്നു. തിരുവല്ല ഭാഗത്ത് വച്ചാണ് ഒരാളുടെ ഫോണ് നമ്പര് അവസാനമായി ഓഫ് ചെയ്തതെന്ന് പോലീസ് കണ്ടെത്തിയിരുന്നു. ആത്മഹത്യ തീരുമാനം എടുത്ത ശേഷം ആദ്യം കണ്ട ബസില് കയറി കോട്ടയത്തേക്ക് പോയി എന്നാണ് നിഗമനം.
പിന്നീട് ഇരുവരും വൈക്കം മുറിഞ്ഞപുര പാലത്തിന് മുകളില് നിന്ന് മൂവാറ്റുപുഴ ആറ്റിലേക്ക് ചാടുന്നത് കോട്ടയം സ്വദേശിയായ യുവാവിന്റെ ശ്രദ്ധയില്പ്പെടുകയായിരുന്നു. ഒരു പെണ്കുട്ടിയെ കൈപിടിച്ച് വലിച്ച് മറ്റേ പെണ്കുട്ടി ആറ്റിലേക്ക് ചാടിയെന്നാണ് ദൃക്സാക്ഷിയായ യുവാവ് പറയുന്നത്. സംഭവ സ്ഥലത്തു നിന്ന് ഒരു ജോഡി ചെരുപ്പും തുവാലയും ലഭിച്ചിരുന്നു. ഇതേ തുടര്ന്നാണ് പോലീസും ഫയര്ഫോഴ്സും തിരച്ചില് നടത്തിയത്.
