മുംബൈ: ബോളിവുഡുമായി ബന്ധപ്പെട്ട ലഹരിമരുന്ന് കേസില്‍ നടന്‍ അര്‍ജുന്‍ രാംപാലിന്റെ മുംബൈയിലെ വീടുകളില്‍ നര്‍ക്കോട്ടിക്സ് കണ്‍ട്രോള്‍ ബ്യൂറോ (എന്‍സിബി) റെയ്ഡ് നടത്തി. അന്ധേരി, ഖാര്‍, ബാന്ദ്ര എന്നിവിടങ്ങളിലെ വീടുകളിലായിരുന്നു റെയ്ഡ്.
ലഹരി ഇടപാടില്‍ അര്‍ജുന്‍ രാംപാലിന്റെ സ്ത്രീ സുഹൃത്ത് ഗബ്രിയേല ഡെമെത്രിയാഡ്സിന്റെ സഹോദരന്‍ അഗിസിലാവസിനെ എന്‍സിബി അറസ്റ്റ് ചെയ്തിരുന്നു. ദക്ഷിണാഫ്രിക്കന്‍ പൗരനായ ഇയാളില്‍ നിന്ന് ഹാഷിഷ്, അല്‍പ്രാസോളം ഗുളികകള്‍ തുടങ്ങിയവ കണ്ടെത്തിയതിനെ തുടര്‍ന്നായിരുന്നു അറസ്റ്റ്.
സിനിമാ നിര്‍മാതാവ് ഫിറോസ് നാദിയാദ്വാലയുടെ വീട്ടില്‍ ശനിയാഴ്ച നടത്തിയ റെയ്ഡിലും എന്‍സിബി ലഹരി വസ്തുക്കള്‍ കണ്ടെത്തി. ഫിറോസ് നാദിയാദ്വാലയുടെ ഭാര്യയെ ഇന്നലെ അറസ്റ്റ് ചെയ്ത എന്‍സിബി ഇവരെ വൈദ്യ പരിശോധനയ്‌ക്ക് വിധേയയാക്കി. ഫിറോസിനെയും ചോദ്യം ചെയ്യാന്‍ വിളിപ്പിച്ചിട്ടുണ്ട്.
നവി മുംബൈ, വെസ്റ്റ് മുംബൈ എന്നിവിടങ്ങളിലെ തെരച്ചിലില്‍ കഞ്ചാവ് മെഫെഡ്രോണ്‍ തുടങ്ങിയവ വന്‍തോതില്‍ കണ്ടെത്തിയതായും അഞ്ച് ഇടനിലക്കാരെ കഴിഞ്ഞ ദിവസം രാവിലെ അറസ്റ്റ് ചെയ്തതായും എന്‍സിബി അറിയിച്ചു.നാളെ നേരിട്ട് ഹാജരാകാന്‍ അര്‍ജുന്‍ രാംപാലിന് എന്‍സിബി നോട്ടീസ് നല്‍കിയിട്ടുണ്ട്.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: