കൊല്ലം: കൊവിഡ് പ്രതിരോധത്തിന്റെ ഭാഗമായി വിദ്യാഭ്യാസ സ്ഥാപനങ്ങള്‍ക്കൊപ്പം കൊല്ലം പബ്ലിക് ലൈബ്രറിയും അടച്ചിട്ട് എട്ടുമാസമായി. കൃത്യമായി പരിപാലിക്കാത്തതിനാല്‍ പഴക്കമുള്ള ആയിരക്കണക്കിന് പുസ്തകങ്ങള്‍ പലതും ദയനീയവസ്ഥയിലാണ്.
ഒരുമാസം മുന്‍പ് സുരക്ഷാ ജീവനക്കാര്‍ പുസ്തകങ്ങള്‍ പൊടിതട്ടി വൃത്തിയാക്കിയെന്നാണ് ഭരണസമിതി അംഗങ്ങളുടെ പക്ഷം. പക്ഷെ തുറന്ന് പ്രവര്‍ത്തിക്കുമ്പോള്‍ തന്നെ എടുക്കാത്ത പുസ്തകങ്ങള്‍ പ്രാണികള്‍ ഭക്ഷണമാക്കുമായിരുന്നു. ഇനിയും തുറക്കാന്‍ വൈകിയാല്‍ വന്‍നഷ്ടമാകും അക്ഷരസ്‌നേഹികള്‍ക്ക് ഉണ്ടാകുക.
ഒരുമാസം മുന്‍പിറങ്ങിയ സര്‍ക്കാര്‍ ഉത്തരവ് പ്രകാരം സംസ്ഥാനത്തെ ഒട്ടുമിക്ക ലൈബ്രറികളിലും പുസ്തകവിതരണം തുടങ്ങിയിരുന്നു. വായനക്കാരെ ഉള്ളില്‍ പ്രവേശിപ്പിക്കാതെ പുസ്തക വിതരണം നടത്തണമെന്ന് ആവശ്യപ്പെട്ട് പബ്ലിക് ലൈബ്രറി ജീവനക്കാര്‍ കളക്ടറെ സമീപിച്ചെങ്കിലും തീരുമാനമായില്ല. ലൈബ്രറിയുടെ ഭരണസമിതി ചെയര്‍മാനാണ് കളക്ടര്‍.
നിലവില്‍ കറണ്ട് ചാര്‍ജ് അടയ്‌ക്കാന്‍ പോലും നിവൃത്തിയില്ല. ലൈബ്രറി, സോപാനം ആഡിറ്റോറിയം, സരസ്വതി, സാവിത്രി ഹാള്‍ എന്നിവിടങ്ങളിലെ 115000 രൂപയുടെ വൈദ്യുതി ബില്ല് കഴിഞ്ഞ ദിവസമെത്തി. ഇതടയ്‌ക്കാന്‍ ഒരു മാര്‍ഗവുമില്ല. കൊല്ലം പബ്ലിക് ലൈബ്രറി വളപ്പിലുള്ള സോപാനം ആഡിറ്റോറിയം, സാവിത്രി ഹാള്‍, സരസ്വതി ഹാള്‍ എന്നിവിടങ്ങളിലെ വാടക വരുമാനം കൊണ്ടാണ് ജീവനക്കാര്‍ക്ക് ശമ്പളവും മറ്റ് ആനുകൂല്യവും നല്‍കിപോന്നത്. ഇവിടെ പരിപാടികളൊന്നും നടക്കാതായതോടെ വരുമാനം നിലച്ചു. ലോക്ഡൗണിന് ശേഷം ഏപ്രില്‍ മാസത്തെ പകുതി ശമ്പളം മാത്രമാണ് ജീവനക്കാര്‍ക്ക് ലഭിച്ചത്.
പ്രതികരിക്കാൻ ഇവിടെ എഴുതുക: