പാരീസ്: ടോപ്പ് സീഡ് റാഫേല്‍ നദാല്‍ പാരീസ് മാസ്‌റ്റേഴ്‌സ് ടെന്നീസ് ചാമ്പ്യന്‍ഷിപ്പിന്റെ ക്വാര്‍ട്ടര്‍ ഫൈനലില്‍ പ്രവേശിച്ചു. ജോര്‍ദാന്‍ തോംപ്‌സണിനെ നേരിട്ടുള്ള സെറ്റുകള്‍ക്ക് തോല്‍പ്പിച്ചാണ് നദാല്‍ ക്വാര്‍ട്ടറിലെത്തിയത്. സ്‌കോര്‍: 6-1, 7-6.
കഴിഞ്ഞ ദിവസം ഇവിടെ ആദ്യ റൗണ്ടില്‍ ജയിച്ചതോടെ നദാല്‍ കരിയറില്‍ ആയിരം വിജയങ്ങള്‍ പൂര്‍ത്തിയാക്കി. ഈ നേട്ടം സ്വന്തമാക്കുന്ന നാലാമത്തെ താരമാണ് നദാല്‍.
ജര്‍മനിയുടെ അലക്‌സാണ്ടര്‍ സ്വരേവും ക്വാര്‍ട്ടറില്‍ കടന്നു. ഫ്രാന്‍സിന്റെ അഡ്രിയന്‍ മന്നാറിനോയെ തോല്‍പ്പിച്ചു. മൂന്ന് മണിക്കൂര്‍ നീണ്ട് മത്സരത്തില 7-6, 6-7, 6-4 എന്ന സ്‌കോറിനാണ് സ്വരേവ് ജയിച്ചുകയറിയത്.
സ്റ്റാന്‍ വാവ്‌റിങ്കയാണ് അടുത്ത റൗണ്ടില്‍ സ്വരേവയുടെ എതിരാളി. വാവ്‌റിങ്ക റഷ്യയുടെ ആന്ദ്രെ റുബ്‌ലേവിനെ ഒന്നിനെതിരെ രണ്ട് സെറ്റുകള്‍ക്ക് തോല്‍പ്പിച്ചു. സ്‌കോര്‍: 1-6, 6-4, 6-3.
ഇന്ത്യയുടെ റോഹന്‍ ബൊപ്പണ്ണയും ഓസ്‌ട്രേലിയയുടെ ഒലിവറും ചേര്‍ന്ന സഖ്യം ഡബിള്‍സിന്റെ ക്വാര്‍ട്ടര്‍ ഫൈനലില്‍ കടന്നു. ഒമ്പതാം സീഡായ ഫാബ്‌റൈസ്-ജീന്‍ ജൂലിയന്‍ ടീമിനെ ഒന്നിനെതിരെ രണ്ട് സെറ്റുകള്‍ക്ക് അട്ടിമറിച്ചു. സ്‌കോര്‍: 3-6, 6-4, 10-8.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: