തിരുവനന്തപുരം : ബിനീഷ് കോടിയേരിയുടെ വീട്ടില് തെരച്ചിലിന് ശേഷം മടങ്ങിയ എന്ഫോഴ്സ്മെന്റ് ഉദ്യോഗസ്ഥരെ പോലീസ് തടഞ്ഞു നിര്ത്തിയത് നിയമവാഴ്ചയോടുള്ള വെല്ലുവിളിയാണെന്ന് ബിജെപി സംസ്ഥാന അധ്യക്ഷന് കെ. സുരേന്ദ്രന്. ദേശീയ അന്വേഷണ ഏജന്സിയുടെ ജോലി തടസപ്പെടുത്താനുള്ള സംസ്ഥാന സര്ക്കാരിന്റെ നീക്കമാണ് ഇതെന്നും അദ്ദേഹം കുറ്റപ്പെടുത്തി.
വാളയാറില് അടക്കം നീതി നിഷേധിക്കപ്പെട്ട നിരവധി കുഞ്ഞുങ്ങള് സംസ്ഥാനത്തുണ്ട്. അപ്പോഴൊന്നും ഇടപെടാത്ത ബാലാവകാശ കമ്മീഷനാണ് കോടിയേരിയുടെ വീട്ടില് നടന്ന തെരച്ചില് മുടക്കാനെത്തിയത്. ബാലാവകാശ കമ്മീഷനേയും പോലീസിനേയും ഉപയോഗിച്ച് അന്വേഷണ ഏജന്സികളുടെ നടപടികളെ തടസപ്പെടുത്താനാണ് നീക്കം. ഇത് ജനാധിപത്യവിരുദ്ധവും ഫെഡറല് വ്യവസ്ഥയുടെ ലംഘനവുമാണെന്നും സുരേന്ദ്രന് കുറ്റപ്പെടുത്തി.
കോഴിക്കോട് ഇന്നും ആറുവയസുള്ള കുഞ്ഞ് പീഡിപ്പിക്കപ്പെട്ടിട്ടുണ്ട്. കേരളത്തില് കുട്ടികള്ക്ക് നേരെ തുടര്ച്ചയായ അതിക്രമങ്ങളാണുണ്ടാകുന്നത്. ഇതിലൊന്നും പ്രതികരിക്കാത്ത സിപിഎം പാര്ട്ടി സെക്രട്ടറിയുടെ മകന് മയക്കുമരുന്ന് കേസില് കുടുങ്ങിയപ്പോള് നടക്കുന്ന അന്വേഷണം തടസപ്പെടുത്താനായി ബാലാവകാശ കമ്മീഷന് ഓടിയെത്തിയത് പ്രതിഷേധാര്ഹമാണ്.
കേന്ദ്ര ഏജന്സികളുടെ അന്വേഷണം അട്ടിമറിക്കാന് മുഖ്യമന്ത്രി സര്ക്കാര് സംവിധാനങ്ങള് മുഴുവന് ദുരുപയോഗം ചെയ്യുകയാണ്.
ബിനീഷ് കോടിയേരിക്കെതിരായ കേസ് രാഷ്ട്രീയ പ്രേരിതമാണെന്ന സിപിഎം നിലപാട് അവരുടെ അണികള്ക്ക് പോലും അംഗീകരിക്കാനാവില്ല.
എന്ഫോഴ്സ്മെന്റ് തെരച്ചിലിന് ശേഷം മുന്കൂട്ടി തയ്യാറാക്കിയതിന്റെ അടിസ്ഥാനത്തിലുള്ള രാഷ്ട്രീയ നാടകമാണ് കോടിയേരിയുടെ വീട്ടില് നടന്നത്. എകെജി സെന്ററിന്റെ നിര്ദ്ദേശം അനുസരിച്ചാണ് കോടിയേരിയുടെ വീട്ടിലുള്ളവരും പുറത്തുള്ള ബന്ധുക്കളും പ്രതികരിച്ചതെന്നും സുരേന്ദ്രന് കൂട്ടിച്ചേര്ത്തു.
