ഇരിട്ടി: ആറളം പഞ്ചായത്തിലെ വാളത്തോട് മേഖലയില് നിന്നും മുന് സിപിഎം ബ്രാഞ്ച് സെക്രട്ടറിയടക്കം വിവിധ പാര്ട്ടികളില് നിന്നുമുള്ള നാല്പ്പതോളം പേര് ബിജെപിയില് ചേര്ന്നു. സിപിഎം മുന് ബ്രാഞ്ച് സെക്രട്ടറി ബേബി ജോസഫ് കൊരണ്ടിക്ക വേലിയില്, സിപിഐ കിസാന് സഭ അംഗം ജോര്ജ്ജ് വെട്ടിക്കാട്ടില് എന്നിവര് ഉള്പ്പെടെയുള്ള ഇരുപത്തി ഒന്നോളം കുടുംബങ്ങളില് നിന്നായി നാല്പ്പതോളം പേരാണ് ബിജെപിയില് അംഗത്വമെടുത്തത്. പുതുതായി അഗത്വമെടുത്തവരെ ബിജെപി ജില്ലാ പ്രസിഡന്റ് എന്. ഹരിദാസ് വാളത്തോട് നടന്ന ചടങ്ങില് ഷാളണിയിച്ച് സ്വീകരിച്ചു.
നമ്മള് ഏതാദര്ശത്തില് വിശ്വസിച്ച് പ്രവര്ത്തിച്ചുവോ ആ പ്രസ്ഥാനം നമ്മളോട് കാണിച്ചത് കൊടിയ വഞ്ചനയും ചതിയുമായിരുന്നെന്ന് മനസ്സിലാക്കിയതോടെയാണ് ഇത്തരം പ്രസ്ഥാനങ്ങളില് നിന്നും ആളുകള് ബിജെപി എന്ന ദേശീയ പ്രസ്ഥാനത്തിലേക്ക് വരാന് തയ്യാറാവുന്നതെന്ന് ഹരിദാസ് പറഞ്ഞു. ഇന്നത്തെ ആനുകാലിക രാഷ്ട്രീയം വ്യക്തമായി മനസ്സിലാക്കിയവരാണ് ഇത്തരക്കാരെന്നും അദ്ദേഹം പറഞ്ഞു.
യോഗത്തില് ആറളം പഞ്ചായത്ത് കമ്മിറ്റി പ്രസിഡന്റ് സന്തോഷ് കീച്ചേരി അദ്ധ്യക്ഷത വഹിച്ചു. മണ്ഡലം പ്രസിഡന്റ് എം.ആര്. സുരേഷ്, മണ്ഡലം സെക്രട്ടറിമാരായ പ്രിജേഷ് അളോറ, അശോകന് പാലുമ്മി, ന്യൂനപക്ഷ മോര്ച്ച മണ്ഡലം പ്രസിഡന്റ് ജോസ് കല്ലമ്മാരി, സംസ്ഥാന കൗണ്സില് അംഗം ധനഞ്ജയന്, പ്രശാന്ത് തരണി, എം.എസ്. ബിജിലാല് എന്നിവര് പ്രസംഗിച്ചു.
ജന്മഭൂമി ഓണ്ലൈന്