തിരുവനന്തപുരം: കേന്ദ്ര സര്ക്കാര് പാര്ലമെന്റില് പാസാക്കിയ സാമ്പത്തിക സംവരണം കേരളത്തില് നടപ്പാക്കിയപ്പോള് ആരുടെയും നിലവിലുള്ള സംവരണം ഇല്ലാതായിട്ടില്ലെന്ന് മുഖ്യമന്ത്രി പിണറായി വിജയന്. പാര്ലമെന്റ് പാസാക്കിയ നിയമം ആണ് കേരളത്തില് നടപ്പിലാക്കിയത്. കേരളത്തിന് മാത്രം ഇതില് വിട്ടുനില്ക്കാനാവില്ലെന്നും അദേഹം പറഞ്ഞു.
മുന്നോക്ക സമുദായത്തിലെ പാവപ്പെട്ടവര്ക്ക് 10% സംവരണം ഏര്പ്പെടുത്തണമെങ്കില് ഭരണഘടനാ ഭേദഗതി അനിവാര്യമാണ്. അതിന്റെ അടിസ്ഥാനത്തില് പാര്ലമെന്റില് ഭരണഘടനാഭേദഗതി കൊണ്ടുവന്നു. ഇന്ത്യയിലെ കോണ്ഗ്രസും ഇടതുപക്ഷവുമുള്പ്പെടെയുള്ള രാഷ്ട്രീയ പാര്ട്ടികള് ഈ ബില്ലിനെ പിന്തുണച്ചു.
സന്നിഹിതരായിരുന്ന 326 അംഗങ്ങളില് 323 പേരും അനുകൂലിച്ച് വോട്ട് ചെയ്ത് പാസാക്കിയ നിയമമാണ് ഇത്. ആ നിയമമാണ് ഇപ്പോള് കേരളത്തില് നടപ്പിലാക്കുന്നത്. രാജ്യത്താകെ ബാധകമായ നിയമമാണിത്. ഇതിന്റെ പേരില് സര്ക്കാരിനെതിരെ പ്രക്ഷോഭം നയിക്കുന്നവര് ഈ യാഥാര്ത്ഥ്യത്തെ ഉള്ക്കൊള്ളണമെന്നും അദേഹം പറഞ്ഞു.
നിലവിലുള്ള ഒരു വിഭാഗത്തിന്റെയും സംവരണത്തെ ഈ നിയമം ഹനിക്കുന്നില്ല. മുന്നോക്ക വിഭാഗത്തിലെ സാമ്പത്തികമായി പിന്നോക്കം നില്ക്കുന്ന വിഭാഗങ്ങള്ക്ക് പൊതു മത്സര വിഭാഗത്തില്നിന്ന് 10% നീക്കി വയ്ക്കുകയാണ് ഉണ്ടായിട്ടുള്ളത്. നിലവിലുള്ള സംവരണ വിഭാഗങ്ങള്ക്ക് അതേ ആനുകൂല്യം തുടരുന്നുണ്ടെന്നും മുഖ്യമന്ത്രി പറഞ്ഞു.
