തൊടുപുഴ: ഇടുക്കി ജലവൈദ്യുത പദ്ധതിയുടെ ഭാഗമായ മൂലമറ്റം ഭൂഗര്ഭനിലയത്തിലെ തുടര്ച്ചയായ തകരാര് വൈദ്യുതി വകുപ്പിന് തലവേദന. അതേസമയം ശനിയാഴ്ച രാത്രി 11.45 ഓടെ തകരാര് പരിഹരിച്ച് ഒന്നാം നമ്പര് ജനറേറ്റര് വീണ്ടും പ്രവര്ത്തനം തുടങ്ങി. കഴിഞ്ഞ ദിവസം ഒന്നാം നമ്പര് ജനറേറ്റര് കൂടി നിലച്ചതോടെ ആദ്യഘട്ടത്തിലെ മൂന്ന് ജനറേറ്ററുകളുടെയും പ്രവര്ത്തനം നിര്ത്തിവച്ചിരുന്നു. രണ്ടാം നമ്പര് ജനറേറ്റര് പൊട്ടിത്തെറിയെത്തുടര്ന്നും മൂന്നാം നമ്പര് വാര്ഷിക അറ്റകുറ്റപ്പണിയുടെ ഭാഗമായുമാണ് പ്രവര്ത്തനം നിര്ത്തിയത്. ഒന്നാം നമ്പര് ജനറേറ്ററിന്റെ റണ്ണറിനാണ് വെള്ളിയാഴ്ച തകരാര് കണ്ടെത്തിയത്.
ഇതേദിവസം രാത്രി തന്നെ മൂന്നാം നമ്പര് ജനറേറ്ററിന്റെ വാര്ഷിക അറ്റകുറ്റപ്പണി തീര്ത്ത ശേഷം ട്രയല് റണ് നടത്തിയപ്പോള് ഓയില് ലീക്കുണ്ടായെന്നും പറയുന്നു. അതേസമയം ലീക്കല്ല ഉണ്ടായതെന്നും പ്രവര്ത്തനത്തിനാവശ്യമായ ഓയില് ഒഴിച്ചപ്പോള് റണ്ണറില് വീഴുകയും ഇത് ട്രയല് റണ്ണിനിടെ തെറിച്ച് പുറത്തേക്ക് വീഴുകയായിരുന്നുവെന്നുമാണ് അധികൃതരുടെ വിശദീകരണം. രാത്രിയായതിനാല് ആളുകള് കുറവായതിനാല് ഇവയെല്ലാം നീക്കം ചെയ്യാനായില്ല.
നിലവില് അവധിയായതിനാല് അറ്റകുറ്റപ്പണി നീണ്ടുപോകുകയാണ്. രണ്ട് ദിവസത്തിനകം ഈ ജനറേറ്ററും പ്രവര്ത്തിപ്പിക്കാനാകുമെന്നാണ് പ്രതീക്ഷയെന്നും ഉദ്യോഗസ്ഥര് വ്യക്തമാക്കി.
ജനുവരി 20ന് പൊട്ടിത്തെറിയി പ്രവര്ത്തനം നിലച്ച രണ്ടാം നമ്പര് ജനറേറ്ററില് വീണ്ടും തകരാര് കണ്ടെത്തി. ജനറേറ്ററിന്റെ ഇന്സുലേഷനാണ് തകരാര്. വോള്ട്ടേജ് നല്കുമ്പോള് ഇത് കൃത്യമായി കാണിക്കുന്നില്ല. തകരാര് കണ്ടെത്തണമെങ്കില് സ്റ്റേറ്ററിന്റെ വൈന്ഡിങ് പൂര്ണ്ണമായും പരിശോധിക്കേണ്ടതുണ്ട്. കത്തുകയും പുകയുകയും ചെയ്യാത്തതിനാല് എവിടെയാണ് തകറാറെന്ന് കണ്ടെത്താന് സമയമെടുക്കുമെന്നും ഉദ്യോഗസ്ഥര് വ്യക്തമാക്കി.
കൊറോണയെത്തുടര്ന്ന് അറ്റകുറ്റപ്പണിക്ക് ആവശ്യമായ സാമഗ്രികളെത്തിക്കുന്നത് വൈകിയിരുന്നു. അടുത്തിടെ ഇവയെത്തിച്ച് നിര്മാണം പൂര്ത്തിയാക്കിയ ശേഷം നടത്തിയ ട്രയല് റണ്ണിനിടെയാണ് പുതിയ തകരാര് കണ്ടത്.
ഉത്പാദനം കൂട്ടിയത് അടുത്തിടെ
ഇടുക്കി സംഭരണിയിലെ ജലനിരപ്പ് ആദ്യഘട്ട മുന്നറിയിപ്പായ ബ്ലൂ അലേര്ട്ട് പിന്നിട്ടതോടെയാണ് വൈദ്യുതി ഉത്പാദനം കൂട്ടിയത്. 14-ാം തിയതി മുതല് ഉത്പാദനം 4 മില്യണ് യൂണിറ്റില് നിന്ന് ഇരട്ടിയിലധിമായി വര്ദ്ധിപ്പിച്ചിരുന്നു. അധികമായി വരുന്ന വൈദ്യുതി പവര്ഗ്രിഡ് വഴി വില്പ്പന നടത്തി വരികയുമായിരുന്നു. തുടര്ച്ചയായുള്ള തകരാര് വൈദ്യുതി ഉത്പാദനത്തിന് തിരിച്ചടിയാണ്. എല്ലാ ജനറേറ്ററുകളും പ്രവര്ത്തിപ്പിക്കാനായാല് 18.72 മില്യണ് യൂണിറ്റ് വൈദ്യുതിയാണ് ഉത്പാദിപ്പിക്കാനാകുക.
2393.98 അടി വെള്ളം
ഇടുക്കി ജലാശയത്തിലെ ജലനിരപ്പ് 2393.98 അടിയായി കുറഞ്ഞു. ഇന്നലെ രാവിലെ ഏഴിന് രേഖപ്പെടുത്തിയ കണക്ക് പ്രകാരമാണിത്. കഴിഞ്ഞ ദിവസം 2394.02 അടി വരെ എത്തിയെങ്കിലും മഴ കുറഞ്ഞതാണ് ജലനിരപ്പ് കുറയാന് കാരണം. 24 മണിക്കൂറിനിടെ 5.821 മില്യണ് യൂണിറ്റ് നിര്മ്മിക്കാനാവശ്യമായ വെള്ളം ഒഴുകിയെത്തിയപ്പോള് 6.678 മില്യണ് യൂണിറ്റായിരുന്നു വൈദ്യുതി ഉത്പാദനം.
തീ പിടിത്തം ഉണ്ടായിട്ടില്ല: സിഇ
മൂലമറ്റത്തെ വൈദ്യുതി നിലയത്തില് തീ പിടിത്തം ഉണ്ടായി എന്ന തരത്തിലുള്ള വാര്ത്ത ശരിയല്ലെന്ന് കെഎസ്ഇബി ജനറേഷന് വിഭാഗം ചീഫ് എഞ്ചിനീയര്(സിഇ) സിജി ജോസ് ജന്മഭൂമിയോട് പറഞ്ഞു. രണ്ടാം നമ്പര് ജനറേറ്ററിന്റെ തകരാര് ചെറുതാണെങ്കിലും കണ്ടെത്തി പരിഹരിക്കാന് വൈകും. നിലവില് ആറ് ജനറേറ്ററുകളില് നാലും പ്രവര്ത്തന സജ്ജമാണ്. ഒരെണ്ണം ഉടന് തന്നെ പ്രവര്ത്തിപ്പിക്കാനാകുമെന്നും സിഇ പറഞ്ഞു
ജന്മഭൂമി ഓണ്ലൈന്