കൊച്ചി: തിരുവനന്തപുരം വിമാനത്താവള നടത്തിപ്പ് അദാനി ഗ്രൂപ്പിന് നല്കിയത് ചോദ്യം ചെയ്ത് പിണറായി സര്ക്കാര് നല്കിയ ഹര്ജി ഹൈക്കോടതി തള്ളി. ജസ്റ്റിസ് വിനോദ് ചന്ദ്രന്, ജസ്റ്റിസ് സിഎസ് ഡയസ് എന്നിവര് ഉള്പ്പെട്ട ഡിവിഷന് ബെഞ്ചിന്റേതാണ് ഉത്തരവ്. സംസ്ഥാന സര്ക്കാരിനെ മറികടന്ന് അദാനി ഗ്രൂപ്പിന് കരാര് നല്കിയതില് ക്രമക്കേട് ഉണ്ടെന്നായിരുന്നു സര്ക്കാര് വാദം. ലേല നടപടികള് സുതാര്യമല്ലെന്നും സര്ക്കാര് ആരോപിച്ചു. ലേല നടപടികള് അദാനിക്ക് വേണ്ടി ടൈലര് മെയ്ഡ് ആണെന്ന സര്ക്കാര് വാദവും കോടതി തള്ളി.
ഭൂമി ഏറ്റെടുക്കല് അടക്കമുള്ള നടപടി സര്ക്കാര് ആണ് പൂര്ത്തിയാക്കിയത് എന്നതിനാല് കേരളത്തിന് പരിഗണന വേണമെന്ന വാദം അംഗീകരിക്കാന് സാധ്യമല്ലെന്ന് കോടതി വ്യക്തമാക്കി. ടെന്ഡര് നടപടിയുമായി സഹകരിച്ചശേഷം പിന്നീട് തെറ്റാണെന്നു പറയുന്നതും ന്യായീകരിക്കാന് ആകില്ല.
എന്നാല് കേരളത്തിന്റെ ആരോപണങ്ങളില് കഴമ്പില്ലെന്നായിരുന്നു കോടതിയില് കേന്ദ്ര സര്ക്കാര് സ്വീകരിച്ച നിലപാട്. നേരത്തെ ലേലത്തില് പങ്കെടുക്കാന് പ്രത്യേക ഇളവുകളോടെ കേരളത്തിന് അനുമതി നല്കിയിരുന്നു. എന്നാല് ലേലത്തില് പരാജയപ്പെട്ട ശേഷം ഇത്തരം ഒരു ഹര്ജിയുമായി കോടതിയെ സമീപിക്കാന് കേരളത്തിന് അര്ഹത ഇല്ലെന്നും വിശാലമായ പൊതു താല്പര്യം മുന് നിര്ത്തിയാണ് വിമാനത്താവളങ്ങള് പാട്ടത്തിനു നല്കുന്നതെന്നും കേന്ദ്ര സര്ക്കാര് കോടതിയെ അറിയിച്ചു.
രാഷ്ട്രീയമായും നിയമപരമായും സംസ്ഥാന സര്ക്കാര് ഉയര്ത്തിയ കടുത്ത എതിര്പ്പുകളെ മറികടന്നാണ് തിരുവനന്തപുരം വിമാനത്താവള നടത്തിപ്പ് അദാനി ഗ്രൂപ്പിന് നല്കാന് തീരുമാനമായത്. രണ്ട് വര്ഷം മുന്പാണ് വിമാനത്താവള സ്വകാര്യവല്ക്കരണത്തിന് നീക്കം തുടങ്ങുന്നത്. 2019 ഫെബ്രുവരിയില് നടത്തിയ ടെന്ഡറില് അദാനിയാണ് മുന്നിലെത്തിയത്. സര്ക്കാരിന് വേണ്ടി പങ്കെടുത്ത കെഎസ്ഐഡിസി രണ്ടാമതായി.
പിണറായി സര്ക്കാരിന്റെയും യുഡിഎഫിന്റെയും എതിര്പ്പുകള് തള്ളി തിരുവനന്തപുരം രാജ്യാന്തര വിമാനത്താവളത്തിന്റെ നടത്തിപ്പ് അദാനി എന്റര്പ്രൈസസിനു നല്കാനുള്ള തീരുമാനവുമായി മോദി സര്ക്കാര് മുന്നോട്ടു പോയിരുന്നു. ഇതിന്റെ ഭാഗമായി വിവിധ കരാറുകളില് കേന്ദ്ര സര്ക്കാരിന്റെ വകുപ്പുകള് ഒപ്പിട്ടു. എയര്പോര്ട്ട് അതോറിറ്റി ഓഫ് ഇന്ത്യയാണ് അദാനി ഗ്രൂപ്പുമായി വിമാനത്താവള നടത്തിപ്പിനുള്ള ധാരണാപത്രം ആദ്യമായി ഒപ്പിട്ടിരിക്കുന്നത്. പിണറായി സര്ക്കാര് കേസ് നല്കിയിരിക്കുന്നതിനാല് കോടതി നടപടികള്ക്കനുസൃതമായി തുടര്നടപടികള് കൈക്കൊള്ളാം എന്ന അടിസ്ഥാനത്തിലാണ് ധാരണാപത്രം ഒപ്പിട്ടത്. ഇനി കൈമാറ്റ് നടപടികള്ക്ക് മറ്റു തടസങ്ങളില്ല.
