കുന്നത്തൂര്: മൈനാഗപ്പള്ളിയില് നിന്നും വിറ്റ ഭാഗ്യക്കുറിക്ക് ഒന്നാം സമ്മാനം അടിച്ചതു മുതല് ഭാഗ്യവാനെ തിരയുകയായിരുന്നു നാട്ടുകാര്. ഒടുവില് ഇതര സംസ്ഥാനക്കാരനായ ഭാഗ്യവാനെ കണ്ടെത്തിയപ്പോള് ഒരു ടിക്കറ്റിന് രണ്ട് സമ്മാനം. വടക്കന് മൈനാഗപ്പള്ളിയില് സിമന്റ് ബ്രിക്സ് കമ്പനിയിലെ തൊഴിലാളിയായ ബംഗാള് സ്വദേശി ബുദിന് മര്ഡിയ(ലൊക്കന്-28)യ്ക്കാണ് കഴിഞ്ഞ ദിവസം നറുക്കെടുത്ത അക്ഷയ ഭാഗ്യക്കുറിയുടെ ഒന്നാംസമ്മാനം ലഭിച്ചത്.
സമ്മാന തുകയായ 70 ലക്ഷത്തിന് പുറമെ ഇതേ ടിക്കറ്റിന് 5000 രൂപയുടെ സമ്മാനവുമുണ്ട്. മൈനാഗപ്പള്ളി പാണ്ടിച്ചേരില് ലോട്ടറി ഏജന്സിയിലെ വില്പ്പനക്കാരനായ ബാബുക്കുട്ടന് പണ്ടിള്ളയില് നിന്നും വാങ്ങിയ എഇ 509910 നമ്പരിലുള്ള ടിക്കറ്റാണ് സമ്മാനര്ഹമായത്. എട്ടുവര്ഷമായി കേരളത്തില് ജോലി ചെയ്യുന്ന ലൊക്കന് മൂന്നു വര്ഷമായി ഭാര്യ സൗമിനിക്കൊപ്പം മൈനാഗപ്പള്ളിയിലുണ്ട്. സ്ഥിരമായി ലോട്ടറി എടുക്കാറുള്ള ഇയാള്ക്ക് കഴിഞ്ഞ ആഴ്ച 1000 രൂപയും അതിനുമുമ്പ് 2000 രൂപയും ഭാഗ്യക്കുറിയില് നിന്നും സമ്മാനം ലഭിച്ചിട്ടുണ്ട്.
