ന്യൂദല്ഹി : കേരള കോണ്ഗ്രസ് (എം)എല്ഡിഎഫിലേക്ക് പോയതിന്റെ പ്രത്യാഘാതം സംസ്ഥാന ഘടകം സ്വയം നേരിട്ടുകൊള്ളാന് സംസ്ഥാന ഘടകത്തോട് ഹൈക്കമാന്ഡ്. ജോസ് പക്ഷം യുഡിഎഫ് വിട്ടതിന്റെ ഗുണദോഷങ്ങള് പരിശോധിച്ച് തുടര് നടപടികള് സംസ്ഥാനത്തെ കോണ്ഗ്രസ് ഘടകം തന്നെ കൈക്കൊള്ളണം.
അതേസമയം 2018-ല് യുഡിഎഫിന്റെ രാജ്യസഭാ സീറ്റ് ജോസ് കെ. മാണിക്ക് നല്കിയതില് ജാഗ്രതക്കുറവ് ഉണ്ടായിട്ടുണ്ടെന്നും ഹൈക്കമാന്ഡ് വിമര്ശിച്ചു. സംസ്ഥാന ഘടകത്തിന്റെ സമ്മര്ദ്ദത്താലാണ് ഈ സീറ്റ് വിട്ടുനല്കിയതെന്നും കുറ്റപ്പെടുത്തി. ജോസ് കെ മാണി വിഭാഗം എല്ഡിഎഫില് ചേര്ന്നതോടെ രാജ്യസഭ സീറ്റ് ഒഴിയുമെന്ന് അറിയിച്ചിട്ടുണ്ട്. ഇത് കോണ്ഗ്രസ് ദേശീയ നേതൃത്വത്തിന് വന് തിരിച്ചടിയാണ് നല്കുന്നത്. ഇതിനെ തുടര്ന്നാണ് സംസ്ഥാന ഘടകത്തിനെതിരെ ഇത്തരത്തില് രൂക്ഷ വിമര്ശനം ഉയര്ത്തിയിരിക്കുന്നത്.
ജോസ് കെ.മാണിക്ക് രാജ്യസഭാ സീറ്റ് നല്കിയാല് യുഡിഎഫ് ശക്തിപ്പെടും എന്നായിരുന്നു അന്നത്തെ പ്രസിഡന്റ് രാഹുല് ഗാന്ധിയുമായി ദല്ഹിയില് നടത്തിയ കൂടിക്കാഴ്ചയില് സംസ്ഥാന നേതാക്കളായ രമേശ് ചെന്നിത്തലയും ഉമ്മന്ചാണ്ടിയും എം.എം. ഹസ്സനും അടക്കമുള്ളവര് അറിയിച്ചത്. അന്നത്തെ ചര്ച്ചകളുടെ ഇടനിലക്കാരനായ മുസ്ലിം ലീഗ് നേതാവ് പി.കെ കുഞ്ഞാലിക്കുട്ടിയും അതിനെ ശരിവെച്ചിരുന്നു.
സംസ്ഥാന ഘടകത്തെ വിശ്വസിച്ചാണ് ജോസ്.കെ.മാണിക്ക് സീറ്റ് നല്കിയത്. ജോസ് കെ. മാണി രാജി വെയ്ക്കുന്നതോടെ രാജ്യസഭയില് യുപിഎയുടെ അംഗബലം കുറയുമെന്നും ഹൈക്കമാന്ഡ് അറിയിച്ചു. എന്നാല് കേരള കോണ്ഗ്രസ് (എം) യുഡിഎഫ് വിട്ടാലും ദോഷമൊന്നും ഉണ്ടാകില്ലെന്ന് സംസ്ഥാനഘടകം അറിയിച്ചു.
