ബത്തേരി: ബാങ്കില് നിന്നും ലോണെടുത്ത് ഇറക്കിയ നെല്കൃഷി ചീഞ്ഞും, കരിഞ്ഞും നശിക്കുന്നത് കര്ഷകരെ ദുരിതത്തിലാക്കുകയാണ്. മന്തൊണ്ടിക്കുന്ന്, പൂളവയല് പ്രദേശത്തെ കര്ഷകരാണ് നെല്കൃഷിയിലെ രോഗബാധ കാരണം ദുരിതത്തിലായിരിക്കുന്നത്.
പ്രദേശത്തെ പത്ത് പേരടങ്ങുന്ന പ്രെയ്സ് അയല്ക്കൂട്ടം രണ്ട് ഏക്കര് നിലത്തും വനിതാ ഗ്രൂപ്പായ ഗ്രാമോദയം മൂന്ന് ഏക്കര് വയലിലുമാണ് നെല്കൃഷി ഇറക്കിയത്. എന്നാല് കതിരിടാന് പാകമായപ്പോഴേക്കും നെല്ച്ചെടികള് വേരുകള് ചീഞ്ഞും ഓലകള് കരിഞ്ഞും നശിക്കുകയാണ്. ഉമ വിത്ത് ഉപയോഗിച്ച് കൃഷി ചെയ്ത വയലുകളിലാണ് ഈ രോഗം കൂടുതലായി കാണുന്നത്. നെല്ക്കൃഷിയോടുള്ള താല്പര്യം കാരണം ഒന്നര ലക്ഷം രൂപ മുടക്കിയാണ് സംഘങ്ങള് കൃഷി ചെയ്തത്.
എന്നാല് കൃഷിക്ക് രോഗബാധ വന്നതോടെ എന്തു ചെയ്യണമെന്നറിയാത്ത അവസ്ഥയിലായിരിക്കുകയാണ് കര്ഷകര്. കൃഷിവകുപ്പിനെ വിവരം അറിയിച്ചിട്ടുണ്ടന്നും, അധകൃതരുടെ ഭാഗത്തുനിന്നും സഹായം ഉണ്ടാവണമെന്നുമാണ് കര്ഷകരുടെ ആവശ്യം.
