ബത്തേരി: താലൂക്കിന്റെ വിവിധ പ്രദേശങ്ങളില് നിന്നും ബത്തേരി താലൂക്ക് ആശുപത്രിയിലെ ഗൈനക്ക് ഒപിയില് പരിശോധനക്കെത്തുന്ന ഗര്ഭിണികളില് കൊറോണ രോഗബാധ കൂടുതല്. കഴിഞ്ഞ ഒരാഴ്ച്ചക്കിടെ ഇവിടെയെത്തിയ 11 ഗര്ഭിണികള്ക്കാണ് കൊറോണ പോസിറ്റീവായത്.
ഇവരെ ആശുപത്രിയില് അഡ്മിറ്റ് ചെയ്യുന്നതിന് മുമ്പ് നടത്തിയ പരിശോധനയിലാണ് കൊറോണ സ്ഥിരീകരിച്ചത്.ചൊവ്വ, വ്യാഴം ദിവസങ്ങളിലാണ് ആശുപത്രിയില് ഗൈനക്ക് ഒപിയുള്ളത്. ഈ ദിവസങ്ങളില് 140 മുതല് 160 വരെ ഗര്ഭിണികള് പരിശോധനക്കായി എത്തുന്നുണ്ട്. എന്നാല് ഇത്രയും പേര്ക്ക് കൊറോണ മാനദണ്ഡങ്ങള് പാലിച്ച് നില്ക്കാനുളള സ്ഥലപരിമിതിയും മാസ്ക് കൃത്യമായി ഉപയോഗിക്കാതെയും ഗര്ഭിണികള്ക്കൊപ്പം എത്തുന്നവരടക്കം കൂട്ടം കൂടിനില്ക്കുന്നതും ഇതുകാരണമായുണ്ടാകുന്ന സമ്പര്ക്കവുമാവാം രോഗം കൂടുതല് പേരില് സ്ഥിരീകരിക്കാന് കാരണമെന്നാണ് പറയപ്പെടുന്നത്.
ഇത്തരത്തില് ഒപിയിലെത്തുന്ന ഗര്ഭിണികളില് പിന്നീട് കൊറോണ സ്ഥിരീകരിക്കുന്നവരുടെ എണ്ണം കൂടുന്നത് ആശുപത്രി ജീവനക്കാരിലും ആശങ്കയ്ക്കിടയാക്കിയിട്ടുണ്ട്. അയല് സംസ്ഥാനമായ തമിഴ്നാട്ടില് നിന്നടക്കം എത്തുന്നവര് പേരു വിവരങ്ങള് തെറ്റായി, സംസ്ഥാന അതിര്ത്തി പ്രദേശങ്ങളില് നല്കുന്നതും ആരോഗ്യ വകുപ്പിനെ കുഴപ്പിക്കുന്നുണ്ട്.
