ഇടുക്കി: വടക്കന്‍ ആന്‍ഡമാന്‍ കടലിലും ബംഗാള്‍ ഉള്‍ക്കടലിന്റെ തെക്കന്‍ മദ്ധ്യമേഖലയിലുമായി പുതിയ ന്യൂനമര്‍ദം രൂപമെടുത്തു. സംസ്ഥാനത്ത് ഒരിടവേളക്ക് ശേഷം ശക്തമായി കാലവര്‍ഷം, ഇടിമിന്നലോട് കൂടിയ ശക്തമായ മഴയ്‌ക്ക് 13 വരെ സാധ്യത.
ഇന്ന് രാവിലെയാണ് ന്യൂനമര്‍ദം രൂപപ്പെട്ടതായി ഐഎംഡി സ്ഥിരീകരിച്ചത്. ഇന്നും നാളെയുമായി കൂടുതല്‍ ശക്തമാകുന്ന ന്യൂനമര്‍ദം പിന്നീട് പടിഞ്ഞാറ്-വടക്ക് പടിഞ്ഞാറ് ദിശയിലേക്ക് നീങ്ങി വടക്കന്‍ ആന്ധ്രപ്രദേശ് തീരം തൊടും. 13 വരെ ഇടിയോട് കൂടിയ മഴ സംസ്ഥാനത്ത് വിവിധയിടങ്ങളില്‍ ലഭിക്കുമെന്നാണ് നിഗമനം. ഇന്ന് സംസ്ഥാനത്തെമ്പാടും പരക്കെ മഴ ലഭിക്കും. മദ്ധ്യ കേരളത്തിലും വടക്കന്‍ കേരളത്തില്‍ കാസര്‍ഗോഡ് ഒഴികെയുള്ള മറ്റ് ജില്ലകളിലുമാണ് മഴ ശക്തമാകുക. മദ്ധ്യകേരളത്തിലും വടക്കന്‍ കേരളത്തിലും നാളെ ഒറ്റപ്പെട്ട ശക്തമായ മഴ സാധ്യതയുണ്ട്. ഞായറാഴ്ച മദ്ധ്യകേരളത്തിലും തെക്കന്‍ കേരളത്തിലും ശക്തമായ മഴ ലഭിക്കും. ഹൈറേഞ്ച് മേഖലയില്‍ ശക്തമായ മഴയ്‌ക്ക് സാധ്യതയുണ്ട്.
വടക്കന്‍ ജില്ലകളില്‍ ഈ ദിവസം ഇടത്തരം മഴയ്‌ക്കാണ് സാധ്യത. തിങ്കള്‍ മുതല്‍ ശക്തി കുറയുമെങ്കിലും ഒറ്റപ്പെട്ട ശക്തമായ മഴ തുടരും. ഇടിമിന്നലോട് കൂടിയുള്ള മഴയായതിനാല്‍ ജാഗ്രത പാലിക്കണമെന്ന് കാലാവസ്ഥ നീരീക്ഷകര്‍ വ്യക്തമാക്കി. കഴിഞ്ഞ രണ്ട് ദിവസമായി സംസ്ഥാനത്തിന്റെ വിവിധയിടങ്ങളില്‍ ശക്തമായ മഴ ലഭിക്കുന്നുണ്ട്. ഇതിനെ പലരും തുലാമഴ ആയാണ് കണക്കാക്കുന്നത്. എന്നാല്‍ തുലാമഴയെത്താന്‍ 20-ാം തീയതി കഴിയുമെന്നാണ് വിലയിരുത്തല്‍.
പ്രതികരിക്കാൻ ഇവിടെ എഴുതുക: