കൊച്ചി: ജില്ലയില് തദ്ദേശ തെരഞ്ഞെടുപ്പിനുള്ള വോട്ടിങ് യന്ത്രങ്ങളുടെ ആദ്യഘട്ട പരിശോധന ഇന്ന് ആരംഭിക്കും. കച്ചേരിപ്പടി ഉഷ ടൂറിസ്റ്റ് ഹോം കെട്ടിടത്തില് സൂക്ഷിച്ചിരിക്കുന്ന യന്ത്രങ്ങളുടെ പരിശോധനകളാണ് തുടങ്ങുന്നത്. ആദ്യഘട്ട പരിശോധനകള്ക്കുള്ള നടപടിക്രമങ്ങളെല്ലാം പൂര്ത്തിയായി. സംസ്ഥാന തെരഞ്ഞെടുപ്പ് കമ്മീഷന്റെ നിര്ദേശപ്രകാരം ഇലക്ട്രോണിക് കോര്പറേഷന് ഓഫ് ഇന്ത്യയുടെ എഞ്ചിനീയര്മാരാണ് വോട്ടിങ് യന്ത്രങ്ങളുടെ കൃത്യത ഉറപ്പു വരുത്തുന്നത്. ഇതിനായി ആറ് എഞ്ചിനീയര്മാരെയാണ് ചുമതലപ്പെടുത്തിയിരിക്കുന്നത്.
സെപ്തംബര് 25നു ജില്ലയിലെത്തിയ ഇവര് ക്വാറന്റീനില് കഴിയുകയായിരുന്നു. കൊറോണ പോസിറ്റീവ് ആയ ഒരാളെ ഒഴിവാക്കി മറ്റ് അഞ്ചു പേരും ജോലി ആരംഭിക്കാന് തീരുമാനിക്കുകയായിരുന്നു. 12,000 യന്ത്രങ്ങളാണ് ഇവിടെയുള്ളത്. ആദ്യഘട്ട പരിശോധന ഒരു മാസം നീണ്ടു നില്ക്കും. യന്ത്രം തുറന്ന് സാങ്കേതിക തകരാറുകളും നിരീക്ഷിക്കും. പരിഹരിക്കാന് കഴിയുന്ന കേടുപാടുകള് അപ്പോള് തന്നെ പരിഹരിക്കാനാണ് നിര്ദ്ദേശം. പരിശോധനക്കു ശേഷം ഉപയോഗിക്കാന് പറ്റുന്നതാണെന്ന സാക്ഷ്യപത്രം കൈമാറും. ഇത്തരത്തില് സാക്ഷ്യപത്രം ലഭിക്കുന്ന യന്ത്രങ്ങള് മാത്രമാണ് തെരഞ്ഞെടുപ്പില് ഉപയോഗിക്കുക.
കളക്ടറേറ്റില് നിന്ന് പത്ത് ജീവനക്കാരുടെ സഹായവും ഇവര്ക്കുണ്ടാകും. ഇലക്ഷന് ഡെപ്യൂട്ടി കളക്ടര്ക്കു പുറമെ ചാര്ജ് ഓഫീസറുടെ മേല്നോട്ടത്തിലായിരിക്കും പരിശോധനകള്. രാവിലെ പത്തു മുതല് വൈകിട്ട് അഞ്ചു വരെ ആദ്യഘട്ട പരിശോധന തുടരും.
