കണ്ണൂര്: ഒളവിലത്തു സിപിഎം പ്രവര്ത്തകരുടെ നേതൃത്വത്തില് ആര്എസ്എസ് പ്രവര്ത്തകനെ വെട്ടിക്കൊലപ്പെടുത്താന് ശ്രമം. ആര്എസ്എസ് പ്രവര്ത്തകരുടെ വീടുകള് അടിച്ചു തകര്ക്കുകയും വീട്ടുപകരണങ്ങള് നശിപ്പിക്കുകയും ചെയ്തു. ബസ് ഷെല്ട്ടറും തകര്ത്തു.
കുയ്യാലക്കണ്ടി കോളനിയിലെയും നാരായണന് പറമ്പിലെയും ഒരു കൂട്ടം സിപിഎം, ഡിവൈഎഫ്ഐ ക്രിമിനലുകളുടെ നേതൃത്വത്തിലായിരുന്നു ആക്രമണം. പ്രദേശത്തെ ആര്എസ്എസ് ബിജെപി പതാകകളും കൊടിമരങ്ങളും വ്യാപകമായി നശിപ്പിക്കപ്പെട്ടിരുന്നു. ഇതിന്റെ തുടര്ച്ചയായി ഞായറാഴ്ച്ച ഉച്ചക്ക് മാരകായുധങ്ങളുമായി സംഘടിച്ചെത്തിയ സിപിഎം ഗുണ്ടകള് ആര്എസ്എസ് സ്ഥാപിച്ച ബസ് ഷെല്ട്ടര് ആക്രമിക്കുകയും കരി ഓയില് ഒഴിച് വികൃതമാക്കുയും കൊടിതോരണങ്ങള് നശിപ്പിക്കുകയും ചെയ്തിരുന്നു. അതിന് ശേഷമാണ് രാത്രി വീട്ടിലേക്ക് മടങ്ങുകയായിരുന്ന ആര്എസ്എസ് പ്രവര്ത്തകനായ പ്രേമനെ കുയ്യാലക്കണ്ടി കോളനിക്ക് സമീപം ഇതേ ക്രിമിനലുകള് വെട്ടിക്കൊലപ്പെടുത്താന് ശ്രമിച്ചത്. കാലിനും വയറിനും വെട്ടേറ്റ പ്രവര്ത്തകനെ ഇന്ദിരഗാന്ധി സഹകരണ ആശുപത്രിയില് പ്രവേശിപ്പിച്ചു.
എന്നിട്ടും കലിയടങ്ങാതെ, ആര്എസ്എസ് പ്രവര്ത്തകനായ കോറോത്ത് അര്ജുനിന്റെ വീടും യുവമോര്ച്ച തലശ്ശേരി മണ്ഡലം കമ്മിറ്റി വൈസ് പ്രസിഡന്റ് ഒളവിലത്തെ ശരണിന്റെ വീടും അടിച്ചു തകര്ത്തു.
കുയ്യാലക്കണ്ടി കോളനിയിലെയും ഒളവിലത്തെയും സിപിഎം ക്രിമിനലുകളായ സജേഷ്, സനേഷ്, കുഞ്ഞിക്കണ്ണന് എന്ന് വിളിക്കുന്ന ലിജേഷ്, ശ്രീനേഷ്, കോര്യാട്ട് ശരത്, കാട്ടില് പറമ്പത് ശ്രീജിന് എന്ന ചിക്കു, വിപീഷ്, രജത് രാജ്, സാരംഗ് കണ്ണന് എന്നിവരുടെ നേതൃത്വത്തില് ആയിരുന്നു ആക്രമണ പരമ്പര. പ്രദേശത്ത് വന് പോലീസ് സന്നാഹം ക്യാമ്പ് ചെയ്യുന്നുണ്ട്.
ഒളിവിലത്ത് സിപിഎം ആക്രണത്തിനിരയായ നടന്ന വീടുകള് ബിജെപി കണ്ണൂര് ജില്ലാ അധ്യക്ഷന് എന്. ഹരിദാസ്, ജില്ലാ കമ്മിറ്റിയംഗം ലീന പ്രദീപ്, തലശ്ശേരി യുവമോര്ച്ച മണ്ഡലം അധ്യക്ഷന് പ്രജീഷ് മഠത്തില്, ബിജെപി ചൊക്ലി പഞ്ചായത്ത് അധ്യക്ഷന് ഷാജി മേനപ്രം, ന്യൂമാഹി ബിജെപി പഞ്ചായത്ത് അധ്യക്ഷന് പ്രേംനാഥ് ചെലോട്ട്, പ്രവീണ് മഠത്തില്, ചൊക്ലി പഞ്ചായത്ത്, ജനറല് സെക്രട്ടറി ബിജൂട്ടി, മണ്ഡലം കമ്മറ്റിയംഗം വി.സി. ബാബു എന്നിവര് സന്ദര്ശിച്ചു.
ജന്മഭൂമി ഓണ്ലൈന്