ആലപ്പുഴ: അമ്മയോടൊപ്പം ആലപ്പുഴ ബീച്ചിലെത്തിയ രണ്ടരവയസ്സുകാരനെ കടലിൽ കാണാതായി. തൃശൂർ പുതിയപറമ്പ് ലക്ഷ്മണന്റെ രണ്ടര വയസുള്ള അതുൽ കൃഷ്ണ (ആദി) എന്ന കുട്ടിയെയാണ് ആലപ്പുഴ ഇഎസ്ഐ ജംങ്ഷന് സമീപം കടലിൽ കാണാതായത്.
ചേർത്തല ചാരമംഗലം സ്വദേശിയായ സഹോദരി ഭർത്താവിനോടൊപ്പമാണ് ആലപ്പുഴ ബീച്ചിലെത്തിയത്. ഇവരൊടൊപ്പം മറ്റ് രണ്ട് മക്കളുമുണ്ടായിരുന്നു. കടലിൽ കളിക്കുന്നതിനിടെ കുട്ടികൾ തിരമാലയിൽപ്പെടുകയായിരുന്നു. മൂത്ത കുട്ടികളെ രക്ഷിക്കുന്നതിനിടെയാണ് രണ്ടര വയസുള്ള കുട്ടിയെ തിരയിൽപ്പെട്ട് കാണാതായതെന്ന് കുട്ടിയുടെ ബന്ധു പറഞ്ഞു.
കുട്ടിയെ കണ്ടെത്തുവാൻ വേണ്ടി കുട്ടിയുടെ അച്ഛനും മത്സ്യത്തൊഴിലാളികളും പോലീസും ചേർന്ന് തിരച്ചിൽ നടത്തുകയാണ്. മഴയും കാറ്റും ഉള്ളതിനാൽ കടൽ പ്രക്ഷുബ്ദമാണ്. തൃശ്ശൂരിൽ ഒരു കല്യാണത്തിൽ പങ്കെടുത്തശേഷം അനിത, രണ്ടുമക്കളും സഹോദരന്റെ മകനുമായി ആലപ്പുഴയിലെത്തിയതാണ്. ഇന്ദിരാ ജങ്ഷനിൽ വാടകയ്ക്കു താമസിക്കുന്ന ബന്ധുവായ ബിനുവിന്റെ വീട്ടിലാണ് വന്നത്. അവിടെനിന്ന് ബിനുവുമൊത്ത് ബീച്ചിലെത്തി.
കുട്ടികളും അനിതയും സെൽഫിയെടുത്തുകൊണ്ടിരിക്കുകയായിരുന്നു. വാഹനം റോഡിൽനിന്ന് മാറ്റിയിടാൻപോയ ബിനു തിരികെവരുമ്പോൾ കണ്ടത് അനിതയും കുട്ടികളും തിരയിലകപ്പെട്ട കാഴ്ചയാണ്. എല്ലാവരെയും കരയിലേക്കുകയറ്റാൻ ശ്രമിച്ചെങ്കിലും ആദികൃഷ്ണ കൈവിട്ടുപോകുകയായിരുന്നു.
