ന്യൂദല്ഹി : ഇന്ത്യന് സൈന്യത്തിന് കരുത്ത് പകര്ന്ന് റഫാല് യുദ്ധ വിമാനങ്ങള് വ്യോമസേനയുടെ ഭാഗമായി. ആദ്യ ബാച്ചിലെ അഞ്ച് വിമാനങ്ങളാണ് ഇന്ന് ഔദ്യോഗികമായി ഇന്ത്യന് വ്യോമസേനയുടെ ഭാഗമായത്. സര്വ്വ ധര്മ്മ പൂജ ഉള്പ്പടെ നടത്തിയാണ് റഫാല് ഇന്ത്യന് സൈന്യത്തിലേക്ക് എത്തിയത്.
അംബാല വ്യോമസേന താവളത്തില് നടന്ന ചടങ്ങില് ഫ്രഞ്ച് പ്രതിരോധ മന്ത്രി ഫ്ളോറന്സ് പാര്ലി മുഖ്യാതിഥിയായി. പ്രതിരോധമന്ത്രി രാജ്നാഥ് സിങ്, ദേശീയ സുരക്ഷാ ഉപദേഷ്ടാവ് അജിത് ദോവല്, സംയുക്ത സൈനിക മേധാവി ജനറല് ബിപിന് റാവത്ത്, വ്യോമസേനാ മേധാവി എയര്ചീഫ് മാര്ഷല് ആര്.കെ.എസ്. ബദൗരിയ, പ്രതിരോധ സെക്രട്ടറി ഡോ. അജയ്കുമാര് തുടങ്ങിയവര് പങ്കെടുത്തു. ഇത് കൂടാതെ ഫ്രഞ്ച് റഫേലിന്റെ സാങ്കേതിക ഗവേഷണ രംഗത്തെ കമ്പനികളുടെ പ്രതിനിധികളും ചടങ്ങില് പങ്കുകൊണ്ടു.
അംബാല വ്യോമതാവളത്തില് വെച്ച് നടന്ന ചടങ്ങില് പ്രതിരോധ മന്ത്രി രാജ്നാഥ് സിംഗ് ആണ് വ്യോമസേനയ്ക്ക് വിമാനങ്ങള് ഔദ്യോഗികമായി കൈമാറിയത്. രാവിലെ 10.30 യോടെയാണ് വ്യോമതാവളത്തില് ചടങ്ങുകള് ആരംഭിച്ചത്. അംബാല വ്യോമസേന താവളത്തില് റഫാലിന് വാട്ടര് സല്യൂട്ടും നല്കി. അതിനുശേഷം ആകാശ പ്രകടനവും നടത്തി.
അതിര്ത്തിയുടെ മികച്ച കാവല്ക്കാരനായി റഫാല് നിലകൊള്ളും. വ്യോമസേനയുടെ പ്രതിരോധശേഷിയില് വിപ്ലവകരമായ മാറ്റങ്ങള് ഉണ്ടാകുമെന്നും പ്രതിരോധ മന്ത്രി രാജ്നാഥ് സിങ് ചടങ്ങില് അറിയിച്ചു. ഇന്ത്യയുടെ പരമാധികാരത്തെ ചോദ്യം ചെയ്യുന്നവര്ക്കുള്ള ശക്തമായ സന്ദേശമാണിത്. അതിര്ത്തിയിലെ നിലവിലെ അന്തരീക്ഷത്തില് ഇത് ഏറെ പ്രധാനമാണെന്നും പ്രതിരോധമന്ത്രി പറഞ്ഞു.
വ്യോമസേനയുടെ ചരിത്രത്തിലെ തന്നെ പുതിയ അധ്യായമാണ് ഇതെന്ന് വ്യോമസേന മേധാവി എയര് ചീഫ് മാര്ഷന് ആര്.കെ.എസ്. ബദൗരിയയും ചടങ്ങില് പറഞ്ഞു.
2020 ജൂലൈ 27 നാണ് ഫ്രാന്സില് നിന്ന് ആദ്യ ബാച്ച് അഞ്ച് റാഫേല് വിമാനങ്ങള് അമ്പാലയിലെത്തിയത്. വ്യോമസേനയുടെ സ്ക്വാഡ്രണ് 17 ഗോള്ഡന് ആരോസ് വിഭാഗത്തിലാണ് റാഫേല് അനാഛാദന ശേഷം എത്തുന്നത്.
