തിരുവനന്തപുരം : കുട്ടനാട് ഉപതെരഞ്ഞെടുപ്പില് സീറ്റ് കേരള കോണ്ഗ്രസ് ജോസഫ് വിഭാഗത്തിനെന്ന് യുഡിഎഫ്. തിരുവനന്തപുരത്ത് ചേര്ന്ന യുഡിഎഫ് യോഗത്തിലാണ് ഇക്കാര്യം അറിയിച്ചിരിക്കുന്നത്. കുട്ടനാട് കോണ്ഗ്രസ് സീറ്റില് ജേക്കബ് എബ്രഹാം മത്സരിക്കുമെന്നതെന്ന് പി.ജെ. ജോസഫും അറിയിച്ചിട്ടുണ്ട്.
രണ്ടില ചിഹ്നത്തില് മത്സരിക്കാന് ആഗ്രഹമെന്ന് ജേക്കബ് ഏബ്രഹാം പ്രതികരിച്ചു. പാര്ട്ടി രണ്ട് തട്ടിലായതില് വിഷമമുണ്ട്. തെരഞ്ഞെടുപ്പില് ഇതൊന്നും പ്രതിഫലിക്കില്ല. സര്ക്കാരിനെതിരായ വിധിയെഴുത്ത് കുട്ടനാട്ടിലുണ്ടാകുമെന്നും ജേക്കബ് എബ്രഹാം പറഞ്ഞു.
അതേസമയം ഇന്ന് ചേര്ന്ന യുഡിഎഫ് യോഗത്തില് ജോസ്കെ. മാണി വിഭാഗത്തെ ക്ഷണിച്ചിരുന്നില്ലെന്ന് രമേശ് ചെന്നിത്തല അറിയിച്ചു. കെ. എം. മാണി യുഡിഎഫിന്റെ മഹാനായ നേതാവാണ്. എന്നും യുഡിഎഫിനൊപ്പം നില്ക്കാനും കെ.എം. മാണി ആഗ്രഹിച്ചിരുന്നു. എന്നാല് ജോസ് കെ. മാണി വിശ്വാസ വഞ്ചന കാണിച്ചെന്നും ചെന്നിത്തല പറഞ്ഞു.
ജോസ് കെ. മാണി വിഭാഗം ഇടത് മുന്നണിയുമായി അടുത്തതായും യോഗം വിലയിരുത്തി. അവരെ യുഡിഎഫില് നിന്നും പുറത്താക്കിയതല്ല. സ്വയം പുറത്തുപോയതാണ്. ഇത് ജനങ്ങളെ ബോധ്യപ്പെടുത്താനും യുഡിഎഫ് തീരുമാനിച്ചിട്ടുണ്ട്.
ഷിബു ബേബി ജോണ് ആണ് ചവറയിലെ സ്ഥാനാര്ത്ഥി. രണ്ടിടത്തും യുഡിഎഫിന് അനുകൂലമാണ് നിലവിലെ സ്ഥിതിയെന്നും പ്രതിപക്ഷ നേതാവ് രമേശ് ചെന്നിത്തല യുഡിഎഫ് യോഗത്തിന് ശേഷം അറിയിച്ചു.
