കൊല്ലം: ചവറ,കുട്ടനാട് ഉപതെരെഞ്ഞെടുപ്പുകളിലേയ്‌ക്കുള്ള സ്ഥാനാര്‍ഥികളെ എന്‍ഡിഎ യോഗത്തില്‍ പ്രഖ്യാപിക്കുമെന്ന് ബിജെപി സംസ്ഥാന അധ്യക്ഷന്‍ കെ.സുരേന്ദ്രന്‍. കേരളത്തില്‍ എന്‍ഡിഎയുടെ ശക്തമായ മുന്നേറ്റത്തിന്റെ അടിത്തറ ഇടുന്ന തിരഞ്ഞെടുപ്പാണ് വരാന്‍ പോകുന്നത്. തദ്ദേശ തെരഞ്ഞെടുപ്പില്‍ എല്ലാ വാര്‍ഡുകളിലും മുന്നണി മത്സരിക്കുമെന്നും സുരേന്ദ്രന്‍ വ്യക്തമാക്കി. കൊല്ലത്തു ചേര്‍ന്ന ബിജെപി- ബിഡിജെഎസ് സംസ്ഥാനതല ഉഭയക്ഷി യോഗത്തിനു ശേഷം സംസാരിക്കുകയായിരുന്നു അദേഹം.
സ്വര്‍ണക്കടത്തിലും അഴിമതിയിലും മുങ്ങികുളിച്ച ഭരണപക്ഷത്തിനെതിരെ കേരളത്തില്‍ ജനവികാരം ശക്തമാണ്. ആറന്‍മുളയില്‍ കൊവിഡ് പൊസിറ്റീവായ യുവതി ആംബുലന്‍സില്‍ പീഡനത്തിനിരയായത് ആരോഗ്യമേഖലയുടെ പരാജയമാണ്. നേതൃത്വപ്രതിസന്ധിയും പടലപ്പിണക്കവും തമ്മിലടിയും കാരണം യുഡിഎഫിന് ജനവികാരം പ്രതിഫലിപ്പിക്കാന്‍ സാധിക്കുന്നില്ലെന്നും സുരേന്ദ്രന്‍ പറഞ്ഞു.
നരേന്ദ്രമോദി സര്‍ക്കാര്‍ ആയിരക്കണക്കിന് കോടി രൂപയാണ് പാവപ്പെട്ടവരുടെ കൈകളില്‍ എത്തിച്ചതെന്ന് ബിഡിജെഎസ് അധ്യക്ഷന്‍ തുഷാര്‍ വെള്ളാപ്പള്ളി പറഞ്ഞു. കേന്ദ്ര സര്‍ക്കാരിന്റെ ജനപ്രിയ നയങ്ങള്‍ക്കുള്ള അംഗീകാരമാവും തദ്ദേശ തിരഞ്ഞെടുപ്പെന്നും അദേഹം കൂട്ടിച്ചേര്‍ത്തു.
പ്രതികരിക്കാൻ ഇവിടെ എഴുതുക: