തിരുവനന്തപുരം: ബെംഗളൂരുവില് ലഹരി മരുന്നു കേസില് പിടിയിലായ അനൂപ് മുഹമ്മദുമായി സിപിഎം സംസ്ഥാന ജനറല് സെക്രട്ടറി കോടിയേരി ബാലകൃഷ്ണന്റെ മകന് ബിനീഷ് കോടിയേരിക്ക് അടുത്ത ബന്ധമുണ്ടെന്ന് യൂത്ത് ലീഗ് നേതാവ് പി.കെ. ഫിറോസ്. പ്രതിയായ മുഹമ്മദ് അനൂപിനുവേണ്ടി പണം മുടക്കുന്നത് ബിനീഷാണെന്നും അദ്ദേഹം ആരോപിച്ചു. അനൂപിന്റെ മൊഴിയും ഫിറോസ് പുറത്തുവിട്ടിട്ടുണ്ട്.
കഴിഞ്ഞ ദിവസം ഇതുസംബന്ധിച്ച് ജന്മഭൂമിയും വാര്ത്ത പുറത്തുവിട്ടിരുന്നു. അതിന് പിന്നാലെയാണ് പി.കെ. ഫിറോസും വെളിപ്പെടുത്തലുകള് നടത്തിയിരിക്കുന്നത്. ലോക്ഡൗണിനിടെ മുഹമ്മദ് അനൂപ് കുമരകത്ത് ലഹരി പാര്ട്ടി നടത്തിയെന്നും ലോക്ക്ഡൗണിനിടെയാണ് നൈറ്റ് പാര്ട്ടി നടത്തിയതെന്നും ഫിറോസ് പറഞ്ഞു. ഈ പാര്ട്ടിയില് ബിനീഷ് കോടിയേരി പങ്കെടുത്തിട്ടുണ്ട്. മുഹമ്മദ് അനൂപിന്റെ ഫോണില് നിന്നും ഇതുമായി ബന്ധപ്പെട്ട ചിത്രങ്ങള് ലഭിച്ചിട്ടുണ്ട്.
ഫോണ് രേഖകള് പരിശോധിച്ചാല് ഞെട്ടിക്കുന്ന വിവരങ്ങളാണ്. കേരളത്തിലെ സിനിമാ മേഖലയിലുള്ളവര്ക്കും മയക്കുമരുന്ന് സംഘവുമായി ബന്ധങ്ങളുണ്ട്. മുഹമ്മദ് അനുപിന് സ്വര്ണക്കടത്ത് കേസിലെ പ്രതി സ്വപ്ന സുരേഷ് ഉള്പ്പടെയുള്ളവരുമായും ബന്ധങ്ങളുണ്ട്.
ജൂലൈ 10ന് ഇയാള്ക്ക് വന്നിട്ടുള്ള ഫോണ് കോളുകളും പരിശോധിക്കണം. ആ ദിവസമാണ് സ്വപ്ന സുരേഷ് ബെംഗളൂരുവില് പിടിക്കപ്പെട്ടത്. ഫോണ് രേഖകള് പിന്നീട് പുറത്തുവിടുമെന്നും പി.കെ. ഫിറോസ് കൂട്ടിച്ചേര്ത്തു.
നാര്കോട്ടിക് കണ്ട്രോള് ബ്യൂറോയുടെ യെലഹങ്ക ഓഫീസില് കിട്ടിയ രഹസ്യവിവരത്തിന്റെ അടിസ്ഥാനത്തിലാണ് മുഹമ്മദ് അനൂപ് കഴിഞ്ഞ ദിവസം പിടിയിലായത്. ഈസമയം മുഹമ്മദ് അനൂപിനൊപ്പം മറ്റൊരു മലയാളിയായ ആര് രവീന്ദ്രനും, ടെലിവിഷന് സീരിയല് നടി ഡി. അനിഖയും ഉണ്ടായിരുന്നു.
മൂവരേയും ഒരുമിച്ചാണ് നാര്കോട്ടിക് കണ്ട്രോള് ബ്യൂറോ കസ്റ്റഡിയില് എടുക്കുന്നത്. കൊച്ചിയിലെ ലഹരി പാര്ട്ടികളിലും മുഹമ്മദ് അനൂപ് സജീവമായിരുന്നു. ഒരു വര്ഷം മുന്പാണു താവളം ബെംഗളൂരുവിലേക്കു മാറ്റിയത്. സിനിമ സീരീയല് മേഖലകളിലേക്ക് ലഹരിമരുന്നുകള് നല്കുന്നത് അനൂപ് മുഹമ്മദാണെന്നും കണ്ടെത്തിയിട്ടുണ്ട്.
