മലയിന്കീഴ്: പ്രകൃതിലോല പ്രദേശത്ത് ജെസിബി ഉപയോഗിച്ച് കുന്നിടിച്ച് മണ്ണ് കടത്താനുള്ള ശ്രമം നാട്ടുകാര് തടഞ്ഞു. വിവരമറിഞ്ഞ് സ്ഥലത്തെത്തിയ റവന്യൂ, പഞ്ചായത്ത് അധികൃതര് മണ്ണിടിക്കാനെത്തിയ ജെസിബി പിടിച്ചെടുത്തു.
എരുത്താവൂര് സുബ്രഹ്മണ്യസ്വാമി ക്ഷേത്രം സ്ഥിതി ചെയ്യുന്ന മലയുടെ പടിഞ്ഞാറു ഭാഗത്താണ് കുന്നിടിക്കാന് ശ്രമം നടന്നത്. ഈ കുന്ന് ഇടിക്കുന്നതോടെ ക്ഷേത്രവും കുന്നിനു മുകളിലും സമീപത്തുമുള്ള നിരവധി വീടുകളും നിലംപതിക്കും. വലുതും ചെറുതുമായ പാറക്കൂട്ടങ്ങള് നിറഞ്ഞതാണ് ഈ മല. മണ്ണ് നീക്കിയാല് പാറകള് അടര്ന്നുവീണും അപകടമുണ്ടാകും. ഇത് ബോധ്യപ്പെട്ട നാട്ടുകാരും ക്ഷേത്ര വിശ്വാസികളുമാണ് പ്രതിഷേധവുമായി രംഗത്തെത്തിയത്.
പുരാതനമായ എരുത്താവൂര് സുബ്രഹ്മണ്യ ക്ഷേത്രം തകര്ക്കുക എന്ന ഗൂഢലക്ഷ്യത്തോടെ ചില കേന്ദ്രങ്ങള് നടത്തുന്ന ഈ പ്രവൃത്തി അപലപനീയമെന്ന് സ്ഥലം സന്ദര്ശിച്ച ഹിന്ദു ഐക്യവേദി ജില്ലാ പ്രസിഡന്റ് അഡ്വ. രത്നകുമാര് ആരോപിച്ചു. നെയ്യാറ്റിന്കര താലൂക്ക് സമിതിയംഗം ജഗന്നാഥനും അദ്ദേഹത്തിനൊപ്പം മണ്ണിടിക്കാന് ശ്രമിച്ച സ്ഥലം സന്ദര്ശിച്ചിരുന്നു.
