അടിമാലി: പെട്ടിമുടി ദുരന്തത്തില്‍ കാണാതായവര്‍ക്ക് വേണ്ടി തെരച്ചില്‍ തുടരുന്നു. ഇന്ന് പ്രദേശവാസികളെയും വനവാസികളെയും ഉള്‍പ്പെടുത്തി പുഴയൊഴുകുന്ന വനത്തില്‍ വ്യാപക തെരിച്ചില്‍ നടത്തുമെന്ന് സബ് കളക്ടര്‍ പ്രേം കൃഷ്ണന്‍ ജന്മഭൂമിയോട് പറഞ്ഞു. 180 പേരുടെ സംഘത്തെയാണ് ഇതിനായി കണ്ടെത്തിയിരിക്കുന്നത്.
അതേ സമയം സ്വാതന്ത്രദിനത്തിലും മുഖ്യമന്ത്രിയെത്തിയ ദിവസവം മൃതദേഹങ്ങള്‍ കണ്ടെത്താനായില്ല. ഇന്നലെ രണ്ട് മൃതദേഹങ്ങള്‍ കൂടി കണ്ടെടുത്തിരുന്നു. കണ്ണന്‍ദേവന്‍ കമ്പനിയുടെ കണക്കുകള്‍ പ്രകാരം ഇനി 12 പേരെയാണ് കണ്ടെത്താനുള്ളത്. ഫോറസ്റ്റ് വാച്ചറായ മുരുകേശന്റെ നായകളാണ് ഇന്നലെ ചിന്നത്തായിയുടെ മൃതദേഹം കണ്ടെത്താന്‍ തെരച്ചില്‍ പ്രവര്‍ത്തകരെ സഹായിച്ചത്.
ടൈഗര്‍, റോസി എന്നീ നായ്‌ക്കളാണ് സേനയക്ക് സഹായമായത്. മൃതദേഹം കണ്ടെടുത്ത പുഴയോരത്ത് നിന്ന് നായ പതിവില്ലാതെ കുരയ്‌ക്കുന്നത് ശ്രദ്ധയില്‍ പെട്ടതോടെ അവിടം കേന്ദ്രീകരിച്ച നടത്തിയ തെരച്ചിലിലാണ് ആദ്യ മൃതദേഹം കണ്ടെത്തിയത്. അതേ സ്ഥലത്തിന് അടുത്ത് നിന്ന് തന്നെയാണ് രണ്ടാമത്തെ മൃതദേഹവും കണ്ടെടുത്തത്.
പുഴയെക്കുറിച്ച് വ്യക്തമായ ധാരണയുള്ള പ്രദേശവാസികളുടെ സഹായത്തോടെ ഫയര്‍ഫോഴ്സ്, പോലീസ്, ദുരന്തനിവാരണസേനയുടെയും നേതൃത്വത്തിലാണ് തെരച്ചില്‍ നടക്കുന്നത്. പുഴയോരത്ത് നിന്ന് കൂടുതല്‍ മൃതദേഹം കിട്ടിയതിന്റെ പശ്ചാത്തലിത്തിലാണ് പുഴയോരം കേന്ദ്രീകരിച്ചുള്ള തെരച്ചിലിന് പ്രാധാന്യം നല്‍കുന്നത്. കൂടുതല്‍ തെരച്ചിലിനായി ഡോഗ് സ്‌ക്വാഡും സംഭവസ്ഥലത്തെത്തിയിട്ടുണ്ട്. എറണാകുളം, ഇടുക്കി ജില്ലകളിലെ ഡോഗ് സ്‌ക്വാഡിലെ അഞ്ച് നായകളും തെരച്ചില്‍ സംഘത്തിന് സഹായത്തിനായി എത്തി. കണക്ക് കൂട്ടുന്നതിനും അപ്പുറത്ത് വനത്തില്‍ വെള്ളമുയര്‍ന്നതായാണ് അടയാളങ്ങളില്‍ നിന്ന് വ്യക്തമാകുന്നത്. ഇതിന്റെ അടിസ്ഥാനത്തിലാണ് അവശേഷിക്കുന്നവര്‍ ഒഴുകി പോയതായുള്ള നിഗമനത്തില്‍ നേരത്തെ എത്തിയത്.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: