‘ശുചീകരണ തൊഴിലാളികളുടെ ശമ്പളമെങ്കിലും തരണം ടീച്ചറേ’; ദൈവത്തിന്റെ മാലാഖമാര്‍ക്ക് കേരളത്തില്‍ കണ്ണീര്‍ തോരുന്നില്ല; സമരത്തിലേക്കെന്ന് ജൂനിയര്‍നഴ്സുമാര്‍

തിരുവനന്തപുരം:’ആശുപത്രിയിലെ ശുചീകരണ തൊഴിലാളിക്ക് ദിവസ വേതനം 1000 രൂപ കിട്ടണുണ്ട് ടീച്ചറേ… അവരുടെ തോഴിലിന് അനുസരിച്ചുള്ള വേതനം. സീനർ നഴ്‌സ്മാരുടെഅതേ ജോലിഭാരത്തോടെ കൊറോണ വാർഡിലുൾപ്പെടെ  ജോലിചെയ്യുന്ന ഞങ്ങൾക്ക് 463 രൂപയും…ശുചീകരണ തൊഴിലാഴികളുടെ ശമ്പളം എങ്കിലും സ്റ്റൈഫണ്ടായിതരണം ടീച്ചേറേ..’ കേരളത്തിന്റെ ആരോഗ്യമന്ത്രി കെ.കെ. ശൈലജയോട് ജൂനിയർ നഴ്‌സുമാരുടെ കണ്ണീരിൽ കുതിർന്ന അപേക്ഷയാണിത്. ശമ്പളവർദ്ധനവ് നൽകിയില്ലെങ്കിൽ കൊറോണാ സാഹചര്യത്തിലും സമരത്തിനൊന് നിർബന്ധിതരാവുകയാണ് ഇവർ.

സർക്കാർ നഴ്‌സിംഗ് കോളേജുകളിൽ നാല് വർഷം ബിഎസ്‌സി നഴ്‌സിംഗ് കഴിഞ്ഞശേഷം മെഡിക്കൽ കോളേജ് ആശുപത്രികളിൽ ഒരുവർഷം നിർബന്ധിത സേവനം നടത്തുന്ന ജൂനിയർ നഴ്‌സുമാരാണ് സ്റ്റൈഫന്റ്‌ വർദ്ധനവിനായി കേഴുഴുന്നത്. പിഎസ്‌സിവഴി നിയമിതരാകുന്ന നഴ്‌സുമാരും സീനിയർ നഴ്‌സുമാരും ചെയ്യുന്ന എല്ലാജോലിയും ഇവരും ചെയ്യണം. ഡേഡ്യൂട്ടി, നൈറ്റ് ഷിഫ്ടും സീനിയേഴ്‌സിന് സമാനം തന്നെ. കൊറോണ വൈറസ് പടർന്നതോടെ പലപ്പോഴും ഐസിയുവിലടക്കം ജൂനിയർ നഴ്‌സുമാർ മാത്രമാണ് ഡ്യൂട്ടിയിലുണ്ടാവുക. കൊറോണ വാർഡിലും ഡ്യൂട്ടി ഉണ്ട്. പിഎസ്‌സി വഴി നിയമിതാരവുന്നവർക്ക് അടിസ്ഥാന ശമ്പളം 27000 രൂപയോളം ശമ്പളം ലഭിക്കുമ്പോൾ ഇവർക്ക് ലഭിക്കുന്നത് 13900 രൂപയാണ്. സ്റ്റൈഫന്റ്‌ ഇനത്തിലായതിനാൽ മറ്റ്  അലവൻസും ഇല്ല. തമാസം , ഭക്ഷണം, യാത്രക്കൂലി ഇവയെല്ലാം കഴിയുമ്പോൾ ശേഷിക്കുന്നത് തുച്ഛമായ തുകയാണ്. വിദ്യാഭ്യാസ വായ്പ അടയക്കാൻ പോലും തികയില്ല.

2019 ജൂലൈമുതൽ ഒരു വർഷത്തോളമായി സ്‌റ്റൈഫണ്ട് വർദ്ധനവെന്ന ആവശ്യവുമായി ഇവർ സെക്രട്ടറിയേറ്റിൽ കയറി ഇറങ്ങുന്നു. ആരോഗ്യമന്ത്രിയെയും ധനകാര്യ മന്ത്രിയേയും അടക്കം പലതവണ സമീപിച്ചു. പക്ഷെ നടപടികൾ ഉണ്ടായില്ല. മൂന്നുവർഷത്തെ ജനറൽ നഴ്‌സിംഗ് ആന്റ് മിഡ് വൈഫറി(ജിഎൻഎം) പഠിച്ചവരും സ്വകാര്യ കോളേജുകളിൽ ബിഎസ്‌സി നഴ്‌സിംഗ്  പഠിച്ചവരും   നാഷണൽ റൂറൽ ഹെൽത്ത് മിഷൻ വഴി നിയമിതരാകുമ്പോൾ 17000ൽഅധികം ആണ് ശമ്പളം.  ശമ്പള വർദ്ധനവിന് ആവശ്യം ഉന്നയിച്ചശേഷവും പലപ്പോഴായി ഇവർ ഒഴികെയുള്ള മറ്റു ഇന്റൺഷിപ്പ്  സ്റ്റാഫിനു സ്‌റ്റൈപ്പന്റ് വർധിപ്പിച്ച് നൽകി. കോവിഡ് കാലത്ത് പ്രത്യേകനിയമനങ്ങൾക്ക്  ശമ്പളവർധവ്  ഉണ്ടായപ്പോഴും സർക്കാർ ഇവരെ കണ്ടില്ലെന്ന് നടിക്കുകയാണ്. 

ഇതോടെയാണ് പ്രത്യക്ഷ സമരത്തിലേക്ക് നീങ്ങുന്നത്. ഈമാസം 8 ന് കരിദിനമായി ആചരിക്കും. അന്ന് കറുത്ത ബാഡ്ജ് ധരിച്ച് ജോലിക്ക കയറും. ഒമ്പതാം തീയതി ഡ്യൂട്ടി ഒഴിവാക്കി പ്രതിഷേധിക്കാനാണ് ഇവരുടെ തീരുമാനം. കൊറോണ രോഗികൾ വർദ്ധിക്കുന്ന സാഹചര്യത്തിലുള്ള സമരം ആരോഗ്യ വകുപ്പിനെ കൂടുതൽ പ്രതിരോധത്തിലാക്കും