സിവില്‍ സര്‍വീസ് പരീക്ഷാ ഫലം: ഒന്നാം റാങ്ക് പ്രദീപ് സിങ്ങിന്; ആദ്യ നൂറില്‍ പത്ത് മലയാളികള്‍ ഇടം നേടി

ന്യൂദല്‍ഹി :  2019ലെ സിവില്‍ സര്‍വീസസ് ഫലം യൂണിയന്‍ പബ്ലിക് സര്‍വീസ് കമ്മീഷന്‍ പ്രസിദ്ധീകരിച്ചു. ആദ്യ നൂറില്‍ പത്ത് മലയാളികള്‍ ഇടംപിടിച്ചു. പ്രദീപ് സിങിനാണ് ഒന്നാം റാങ്ക്. ജതിന്‍ കിഷോര്‍ രണ്ടാം റാങ്കും പ്രതിഭ ശര്‍മ്മ മൂന്നാം റാങ്കും നേടി.

ജയദേവ് അഞ്ചാം റാങ്ക് സ്വന്തമാക്കി. ആര്‍. ശരണ്യ (36), സഫ്ന നസ്റുദ്ദീന്‍ (45), ആര്‍ ഐശ്വര്യ (47), അരുണ്‍ എസ്. നായര്‍ (55), എസ്. പ്രിയങ്ക (68), ബി യശസ്വിനി (71), നിഥിന്‍ കെ ബിജു (89), എ.വി ദേവിനന്ദന (92), പി.പി അര്‍ച്ചന (99) എന്നിവരാണ് ആദ്യ നൂറില്‍ ഇടം നേടിയ മറ്റു മലയാളികള്‍.

829 പേരെയാണ് നിയമനങ്ങള്‍ക്കായി ശുപാര്‍ശ ചെയ്തിരിക്കുന്നത്.  182 പേരെ റിസര്‍വ് ലിസ്റ്റിലും ഉള്‍പ്പെടുത്തിയിട്ടുണ്ട്. ജനറല്‍ വിഭാഗത്തില്‍നിന്ന് 304 പേരും ഇഡബ്ല്യൂഎസ് 78, ഒബിസി 251, എസ്‌സി 129, എസ്ടി വിഭാഗത്തിലെ 67 പേരും ലിസ്റ്റില്‍ ഇടംനേടി.  

വിവിധ സര്‍വീസുകളിലായി 927 ഒഴിവുകളാണ് കേന്ദ്രം റിപ്പോര്‍ട്ട് ചെയ്തിട്ടുള്ളത്. ഐഎഎസ് 180, ഐഎഫ്എസ് 24, ഐപിഎസ് 150, ഗ്രൂപ്പ് എ സര്‍വീസ് 438, ഗ്രൂപ്പ് ബി സര്‍വീസുകളില്‍ 135ഉം ഒഴിവുകളാണുള്ളത്.