തൊടുപുഴ: കൊറോണയുടെ ഭാഗമായുള്ള നിയന്ത്രണം ലംഘിച്ച് മത്സ്യവുമായെത്തി മൊത്ത വ്യാപാരം, മീന് കയറ്റിവന്ന ട്രക്ക് പോലീസ് പിടിച്ചെടുത്തു. സംഭവവുമായി ബന്ധപ്പെട്ട് വാഹന ഉടമ, ജീവനക്കാര്, മത്സ്യം വാങ്ങാനെത്തിയ ചെറുകിട കച്ചവടക്കാര് എന്നിവരുള്പ്പെടെ നിരവധിയാളുകള്ക്കെതിരെ തൊടുപുഴ പോലീസ് കേസെടുത്തു.
വാഹനത്തിന്റെ ഉടമക്കും ജീവനക്കാര്ക്കുമെതിരെ കേസ് രജിസ്റ്റര് ചെയ്തു. പള്ളുരുത്തി കണ്ണന്തറ ദിലീപ് (46), വെങ്ങല്ലൂര് കൊമ്പനാംപറമ്പില് ദിലീപ്(45), മങ്ങാട്ടുകവല മുണ്ടക്കല് സജീവ് എം.എച്ച്.(46) എന്നിവര്ക്കെതിരെയാണ് കേരള പകര്ച്ചവ്യാധി രോഗ ഓര്ഡിനന്സ്, ദുരന്ത നിവാരണ നിയമം എന്നീ വകുപ്പുകള് പ്രകാരം കേസ് രജിസ്റ്റര് ചെയ്തിരിക്കുന്നത്. ശനിയാഴ്ച്ച രാത്രി 11 മണിയോടെയാണ് സംഭവം. കഴിഞ്ഞ ദിവസവും ഇവിടെ ഇത്തരത്തില് വാഹനത്തിലെത്തിച്ച് മത്സ്യം വിറ്റിരുന്നു. നഗരത്തില് വഴിയോര കച്ചവടങ്ങളും മത്സ്യ മാര്ക്കറ്റിന്റെ പ്രവര്ത്തനവും 10 വരെ പൂര്ണ്ണമായും നിരോധിച്ചിരിക്കുകയാണ്.
പ്രവര്ത്തന സമയത്തിനടക്കം കര്ശന നിയന്ത്രണവുമുണ്ട്. ഈ സാഹചര്യത്തിലാണ് രാത്രി വൈകി മത്സ്യക്കച്ചവടം നടത്തിയത്. മങ്ങാട്ടുക്കവല- വെങ്ങല്ലൂര് നാല് വരി പാതയില് മങ്ങാട്ടുക്കവലയ്ക്ക് സമീപത്ത് മത്സ്യ വിപണനശാലയുടെ മുന്നിലാണ് റോഡ് കൈയേറി കച്ചവടം നടന്നത്. ശീതീകരിച്ച ട്രക്കില് ടണ് കണക്കിന് മത്സ്യമെത്തിച്ചിരുന്നു. ഇത് വാങ്ങുന്നതിനായി എഴുപതോളം ചെറുകിട കച്ചവടക്കാര് ഓട്ടോറിക്ഷ, മിനിലോറി, ഇരുചക്രവാഹനം എന്നിവയിലായി ട്രക്കിന് സമീപത്ത് തടിച്ചു കൂടി. ഇതോടെ നാലുവരി പാതയിലെ ഗതാഗതവും ഭാഗീകമായി തടസപ്പെട്ടു. സ്ഥലത്ത് വലിയ ആള്ക്കൂട്ടവും ബഹളവുമായതോടെ പ്രദേശവാസികള് തൊടുപുഴ പോലീസില് വിവരമറിയിക്കുകയായിരുന്നു.
ഉടന് തന്നെ എസ്ഐ അബി കെ.എയുടെ നേതൃത്വത്തിലുള്ള പോലീസ് സംഘമെത്തി ട്രക്ക് സ്റ്റേഷന് കോമ്പൗണ്ടിലേക്ക് മാറ്റി. സംഭവത്തില് സ്ഥലത്ത് ഉണ്ടായിരുന്ന കണ്ടാല് അറിയാവുന്നവര്ക്കെതിരേയും പോലീസ് കേസെടുത്തിട്ടുണ്ട്. തുടര്ന്ന് പോലീസ് നടത്തിയ പരിശോധനയില് എറണാകുളത്തെ ഗോഡൗണില് നിന്നെത്തിച്ച മത്സ്യമാണെന്ന് കണ്ടെത്തി. പഴകിയ മത്സ്യമല്ലെന്ന് കണ്ടതിനാല് 5000 രൂപാ പിഴയടപ്പിച്ച ശേഷം വാഹനം എറണാകുളത്തേക്ക് മടക്കി അയച്ചു. സംഭവത്തില് വരും ദിവസങ്ങളിലും പരിശോധന ശക്തമാക്കുമെന്ന് എസ്ഐ ബൈജു പി. ബാബു പറഞ്ഞു.
ജന്മഭൂമി ഓണ്ലൈന്