റോം: ലാസിയോ മുന്നേറ്റ നിര താരം സിറോ ഇമ്മൊബൈല് സീരി എയില് ഒരു സീസണില് ഏറ്റവും കൂടുതല് ഗോളുകള് നേടിയ ഗോണ്സാലോ ഹിഗ്വെയ്നിന്റെ റെക്കോഡിനൊപ്പമെത്തി, 36 ഗോളുകള്. സീസണിലെ അവസാന മത്സരത്തില് നെപ്പോളിക്കെതിരെ ഗോള് നേടിയതോടെയാണ് ഇമ്മൊബൈല് റെക്കോഡിനൊപ്പമെത്തിയത്. നെപ്പോളി താരമായിരുന്ന ഹിഗ്വെയ്ന് 2015-16 സീസണിലാണ് 36 ഗോളുകള് നേടി റെക്കോഡിട്ടത്.
ഈ സീസണില് ഗോളടിയില് രണ്ടാം സ്ഥാനത്തുള്ള യുവന്റസ് സ്ട്രൈക്കര് ക്രിസ്റ്റിയാനോ റൊണാള്ഡോയെക്കാള് അഞ്ചു ഗോളുകള് ഇമ്മൊബൈല് കൂടുതല് നേടി. ഗോളടിയില് മുന്നില് നില്ക്കുന്ന ഇമ്മൊബൈലിന് യൂറോപ്പിലെ ടോപ്പ് സ്കോറര്ക്കുള്ള സുവര്ണ പാദുകം ലഭിക്കും.
അവസാന മത്സരത്തില് ഇമ്മൊബൈല് ഗോള് നേടിയിട്ടും ലാസിയോ തോറ്റു. ഒന്നിനെതിരെ മൂന്ന് ഗോളുകള്ക്കാണ് ലാസിയോ നെപ്പോളിയോട് തോറ്റത്. ഈ തോല്വിയോടെ സീരി എയില് ലാസിയോ നാലാം സ്ഥാനത്തേക്ക് പിന്തള്ളപ്പെട്ടു. അറ്റ്ലാന്റയ്ക്കും ലാസിയോയ്ക്കും 78 പോയിന്റ് വീതം ലഭിച്ചെങ്കിലും. ഗോള് ശരാശരിയില് ലാസിയോയെ പിന്നിലാക്കി അറ്റ്ലാന്റ മൂന്നാം സ്ഥാനത്തെത്തി.
