താമരശ്ശേരി: പൂനൂര്‍പുഴയില്‍ തേറ്റാമ്പുറം അത്തിക്കുണ്ട് കടവില്‍ കുളിക്കാനിറങ്ങി, ചുഴിയില്‍പെട്ട വിദ്യാര്‍ത്ഥിയെ യുവാവ് സാഹസികമായി രക്ഷപ്പെടുത്തി. അദ്നാന് എന്ന വിദ്യാര്‍ത്ഥിയെയാണ് വി.പി. രതീഷ് എന്ന യുവാവ് രക്ഷപ്പെടുത്തിയത്.
തച്ചംപൊയില്‍ ഒതയോത്ത് അക്ബര്‍ തങ്ങളുടെ മകനും ഉസ്സെന്‍കോയ തങ്ങളുടെ ചെറുമകനുമായ അദ്നാന് കഴിഞ്ഞ ദിവസമാണ് ഒഴുക്കില്‍പെട്ടത്. ഉമ്മയോടൊപ്പം കുളിക്കാനെത്തിയ അദ്നാന് പുഴയില്‍ നീന്തുന്നതിനിടെ ചുഴിയില്‍ അകപ്പെടുകയായിരുന്നു.
ഈ സമയം കുളിക്കാന്‍ വരികയായിരുന്ന സമീപവാസിയായ രതീഷ് കടവില്‍ കുളിക്കുന്നവരുടെ കരച്ചില്‍ കേട്ട് ഓടിയെത്തി പുഴയില്‍ ചാടി ചുഴിയില്‍ മുങ്ങി താഴുകയായിരുന്ന അദ്‌നാനെ രക്ഷപ്പെടുത്തുകയായിരുന്നു. കരയിലെത്തിച്ച അദ്നാന് പരിസരവാസികളായ കെ.കെ. സജീവന്‍, കെ.പി. അനന്തു എന്നിവര്‍ പ്രഥമശുശ്രൂഷ നല്‍കി.മുന്‍പും ഇതേ പുഴയില്‍ രണ്ടു പേര്‍ ഒഴുക്കില്‍പെട്ടപ്പോള്‍ രക്ഷപെടുത്താന്‍ വന്നവരുടെ കൂട്ടത്തില്‍ രതീഷ് ഉണ്ടായിരുന്നു.
രണ്ടു വര്‍ഷം മുമ്പ് ഇതേചുഴിയില്‍പെട്ട് സമീപത്തെ വീട്ടില്‍ വാടകക്ക് താമസിച്ചിരുന്ന കൂരാച്ചുണ്ട് സ്വദേശി അഡ്വ. ബിജു, ഭാര്യ പൊന്നി എന്നിവര്‍ മുങ്ങിമരിച്ചിരുന്നു. അതിനു മുമ്പ് തടായി സ്വദേശിയായ വിദ്യാര്‍ത്ഥിയും പന്നിത്തടത്തില്‍ രാഘവന്‍ എന്ന ആളും ചുഴിയില്‍പ്പെട്ട് മരിച്ചിട്ടുണ്ട്.
ബിജെപി തേറ്റാമ്പുറം ബൂത്ത് കമ്മറ്റി അംഗമായ രതീഷ് നാട്ടിലെ സാമൂഹ്യപ്രവര്‍ത്തനങ്ങളിലും സജീവമാണ്. ബിജെപി ബൂത്ത് കമ്മറ്റിയുടെ നേതൃത്വത്തില്‍ രതീഷിനെ ആദരിച്ചു. സംസ്ഥാന കമ്മിറ്റി അംഗം ഗിരീഷ് തേവള്ളി, ബൂത്ത് പ്രസിഡണ്ട് കെ.പി. സുധീഷ് എന്നിവര്‍ പൊന്നാട അണിയിച്ചു. പി. ശ്രീകുമാര്‍, കെ. ബിജു, കെ.കെ. സജീവന്‍ പങ്കെടുത്തു.
പ്രതികരിക്കാൻ ഇവിടെ എഴുതുക: