ടൂറിന്‍: അപ്രതീക്ഷിത തോല്‍വി ഏറ്റുവാങ്ങിയതോടെ സീരി എ യില്‍ യുവന്റസിന്റെ കിരീട ധാരണം അടുത്ത മത്സരത്തിലേക്ക് നീണ്ടു. നിര്‍ണായക മത്സരത്തില്‍ യുഡിനിസാണ് യുവെയെ ഒന്നിനെതിരെ രണ്ട് ഗോളുകള്‍ക്ക് അട്ടിമറിച്ചത്. പോയിന്റ് നിലയില്‍ ഒന്നാം സ്ഥാനത്ത് തുടരുന്ന യുവന്റസിന് യുഡീനീസിനെ തോല്‍പ്പിച്ചിരുന്നെങ്കില്‍ ഇന്നലെ തന്നെ കിരീടം സ്വന്തമാക്കായിരുന്നു.
കിരീടത്തിനായി യുവന്റസിന് അടുത്ത മത്സരം വരെ കാത്തിരിക്കണം. ഞായറാഴ്ചയാണ് അടുത്ത മത്സരം. സാംപഡോറിയയെയാണ് യുവന്റസ് അന്ന് നേരിടുക. 35 മത്സരങ്ങളില്‍ 80 പോയിന്റുമായാണ് യുവന്റസ് ഒന്നാം സ്ഥാനത്ത് തുടരുന്നത്.
ആവേശപ്പോരാട്ടത്തിന്റെ അവസാന നിമിഷങ്ങളില്‍ ഗോള്‍ നേടിയാണ് യുഡിനീസ് യുവന്റസിനെ അട്ടിമറിച്ചത്. 42-ാം മിനിറ്റില്‍ മത്തിയാസ് ഡി ലിറ്റ് നേടിയ ഗോളില്‍ യുവന്റസ് മുന്നിലെത്തി. ഇടവേളയ്‌ക്ക് അവര്‍ 1-0ന് മുന്നിട്ടുനിന്നു.
രണ്ടാം പകുതിയുടെ തുടക്കത്തില്‍ യുഡിനീസ് ഗോള്‍ മടക്കി. നെസ്‌റ്റോറോവ്‌സിയാണ് സ്‌കോര്‍ ചെയ്തത്. അവസാന നിമിഷങ്ങളില്‍ യുഡിനീസ് വിജയഗോള്‍ കുറിച്ചു. അധികസമയത്ത് ഫോഫാനയാണ് ഗോളടിച്ചത്. ഈ വിജയത്തോടെ 15-ാം സ്ഥാനത്താണ്.
പ്രതികരിക്കാൻ ഇവിടെ എഴുതുക: