ന്യൂദല്‍ഹി: കൊറോണ രോഗമുക്തി നേടി വീട്ടിലെത്തിയ സഹോദരിയെ നൃത്തം ചവിട്ടി ആരതിയുഴിഞ്ഞ് സ്വീകരിച്ച് അനിയത്തി. രോഗം ഭേദമായി എത്തിയ സഹോദരിക്ക് ഗേറ്റുപടിക്കല്‍ ബോക്‌സില്‍ പാട്ടിട്ട് ചുവടുവെച്ച് ആഘോഷപൂര്‍വമായ വരവേല്‍പ്പ് നല്‍കിയ അനിയത്തിയുടെ വീഡിയോ നവമാധ്യമങ്ങളില്‍ ശ്രദ്ധ നേടിയിരിക്കുകയാണ്. വീട്ടില്‍ മടങ്ങിയെത്തിയ മകളെ ആരതി ഉഴിഞ്ഞ് സ്വീകരിക്കുന്ന അമ്മയേയും വീഡിയോയില്‍ കാണാം. ഛത്തീസ്ഗഡ് ബിലാസ്പൂര്‍ ഐജി ബിപന്‍ഷു കബ്രയാണ് തരംഗമായി തീര്‍ന്ന വീഡിയോ ട്വിറ്ററിലൂടെ ആദ്യം ഷെയര്‍ ചെയ്തത്.
സൗഹാര്‍ദവും സ്‌നേഹവും പ്രസരിപ്പും നിറഞ്ഞുനില്‍ക്കുന്ന ഒരു കുടുംബത്തിന്റെയും സന്തോഷം കെടുത്താന്‍ ഒരു പകര്‍ച്ച വ്യാധിക്കും കഴിയില്ല എന്ന കുറിപ്പോടെയാണ് ഹിന്ദി ചിത്രം ചില്ലാര്‍ പാര്‍ട്ടിയിലെ ‘തായ് തായ് പിസ്’ എന്ന ഗാനത്തിന് സഹോദരിമാര്‍ ഡാന്‍സ് ചെയ്യുന്ന വീഡിയോ ബിപന്‍ഷു കബ്രഷെയര്‍ ചെയ്തരിക്കുന്നത്. നാന്നൂറിലധികം റീട്വീറ്റും രണ്ടായിരത്തിലധികം ലൈക്കും കബ്ര പങ്കുവെച്ച പോസ്റ്റിന് ലഭിച്ചു. #sistersduet എന്ന ഹാഷ്ടാഗനൊപ്പം സാമൂഹ്യമാധ്യമങ്ങള്‍ ഏറ്റെടുത്തിരിക്കുകയാണ് ഈ വീഡിയോ.
പ്രതികരിക്കാൻ ഇവിടെ എഴുതുക: