ആര്‍പ്പൂക്കര: കോട്ടയം മെഡിക്കല്‍ കോളേജിലെ ഗൈനക്കോളജി വിഭാഗത്തിലെ യക്ഷിക്കഥയ്ക്കു പിന്നില്‍ മയക്കുമരുന്നുമാഫിയയും അനാശാസ്യസംഘവും. രാത്രികാലങ്ങളില്‍ സ്ത്രീയുടെ ഉച്ചത്തിലുള്ള നിലവിളി കേള്‍ക്കുന്നതായും ഇതു പ്രേതങ്ങളുടെ നിലവിളിയാണെന്നുമാണ് പ്രചരണം നടക്കുന്നത്.
ഗൈനക്കോളജി വാര്‍ഡില്‍ നിന്നാണ് ഈ ശബ്ദം കേള്‍ക്കുന്നത്. അനാശാസ്യത്തിനും ലഹരിവില്പനയ്കുമായി ഇവിടെ പ്രേതബാധ ഉണ്ടെന്നു വരുത്തി തീര്‍ത്ത് ജനങ്ങളില്‍ ഭയം സൃഷ്ടിക്കുകയാണ്. സാമൂഹ്യ വിരുദ്ധരാണ് ഇതിനു പിന്നില്‍ പ്രവര്‍ത്തിക്കുന്നത്. രാത്രി 12 മണിയോടു കൂടി ‘എന്നെ രക്ഷിക്കണേ’ എന്നുള്ള സ്ത്രീ ശബ്ദമാണ് ഗൈനക്കോളജി വാര്‍ഡിന്റെ സമീപമുള്ള ആളൊഴിഞ്ഞ കെട്ടിടത്തില്‍ നിന്നും ഉയരുന്നതെന്നാണ് പറയുന്നത്.
ഈ കെട്ടിടം അനാശാസ്യകേന്ദ്രമാണെന്നും പറയപ്പെടുന്നു. ഇതു മൂലം രാത്രി ഡ്യൂട്ടിയിലുള്ള ജീവനക്കാര്‍ പുറത്തിറങ്ങുവാന്‍ പോലും ഭയപ്പെടുകയാണ്. മെഡിക്കല്‍ കോളേജിലെ പോലീസ് എയ്ഡ് പോസ്റ്റിലെ പോലീസുകാരും സുരക്ഷാ ജീവനക്കാരും സ്ഥലത്ത് പരിശോധന നടത്തിയെങ്കിലും ഒന്നും തന്നെ കണ്ടെത്തുവാന്‍ സാധിച്ചില്ല. ഇതെ തുടര്‍ന്ന് മെഡിക്കല്‍ കോളേജ് അധികൃതര്‍ ഗാന്ധിനഗര്‍ പോലീസില്‍ വിവരം അറിയിച്ചു. പോലീസിന്റെ രഹസ്യാന്വേഷണ വിഭാഗവും അന്വേഷണം നടത്തി.അനാശാസ്യ ലഹരി മാഫിയ സംഘമാണ് ഇതിനു പിന്നിലെന്നാണ് പോലീസിന്റെ വിലയിരുത്തല്‍.
പ്രതികരിക്കാൻ ഇവിടെ എഴുതുക: